Дарсҳо дар муассисаҳои таҳсилоти умумӣ 7 июн ба анҷом мерасанд

Душанбе, 17.05.2016 /АМИТ «Ховар»/. Дар асоси фармоиши вазири маориф ва илми Ҷумҳурии Тоҷикистон машғулиятҳои таълимӣ дар синфҳои 1-11 (12)-и муассисаҳои таҳсилоти умумӣ, сарфи назар аз шакли ташкилию ҳуқуқӣ 7 июни соли 2016 ба анҷом мерасанд.
Тавре ки котиби матбуотии Вазорати маориф ва илми ҶТ Эҳсони Хушбахт ба АМИТ Ховар хабар дод, дар асоси ин фармоиш баргузории аттестатсияи аз синф ба синф гузаронидани хонандагони синфҳои 4-8-и муассисаҳои таҳсилоти умумӣ аз 8 июн то 14 июни соли 2016, аттестатсияи хатми синфҳои 9 аз 9 то 21 июни соли 2016 ва аттестатсияи хатми синфҳои 11 (12)-и муассисаҳои таҳсилоти умумӣ аз 8 то 24 июни соли 2016 дар назар дошта шудааст.
Ҳамчунин тибқи фармоиши мазкур сардорони раёсат ва мудирони шуъбаҳои маорифи шаҳру ноҳияҳои ҷумҳурӣ ва директорони муассисаҳои таҳсилоти умумии дорои мақоми ҷумҳуриявӣ вазифадор гардидаанд, ки ҷадвали аттестатсияи аз синф ба синф гузаронидан ва хатми муассисаҳои таҳсилоти умумиро як моҳ пеш аз саршавии аттестатсия тасдиқ намуда, муҳлати гузаронидани аттестатсияи такрорӣ (тобистона)-ро дар моҳи август муайян намоянд,-илова намуд Эҳсони Хушбахт.