«Ман худам овоз медиҳам» — ҳамоиши Кумитаи иҷроияи ҲХДТ

Душанбе, 18.05.2016 /АМИТ «Ховар»/. 16 майи соли равон дар Мақомоти иҷроияи маҳаллии ҳокимияти давлатии ноҳияи Исмоили Сомонии шаҳри Душанбе таҳти унвони «Ман худам овоз медиҳам» ҳамоиши Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ доир гардид.
Вакили Маҷлиси намояндагони Маҷлиси Олии Ҷумҳурии Тоҷикистон Гулнора Бобоева оид ба  зарурати ворид намудани  тағйиру иловаҳо ба Конститутсияи (Сарқонуни) Ҷумҳурии Тоҷикистон зикр намуд, ки рушди босуботи ҷомеа, бахусус ҷомеаи муосири Тоҷикистон тақозо менамояд, ки меъёрҳои Конститутсия пайваста такмил дода шаванд. Ин тағйироти Конститутсия барои рушди бемайлони соҳаҳои сиёсӣ, иқтисодӣ, иҷтимоӣ ва фарҳангии ҷомеа мусоидат мекунанд.
Раиси ТҶҶ «Созандагони Ватан» Абдулло Раҳмонзода оид ба иштироки ҷавонон дар маъракаи муҳими сиёсӣ зикр намуд, ки Конститусияи (Сарқонуни) Ҷумҳурии Тоҷикистон аз ҷониби коршиносони байналмиллалӣ ҳамчун яке аз конститутсияҳои беҳтарин эътироф гардидааст. Абдулло Раҳмонзода оид ба гаравиши ҷавонон ба ҳизбу ҳаракатҳои ифротӣ ёдовар шуда, иброз дошт, ки пеши роҳи ин амалҳо аз ҷониби худи ҷавонон бояд гирифта шавад.
Раиси филиали Иттифоқи ҷавонони Тоҷикистон  дар шаҳри Душанбе Аббосиддин Саймуддинов аз  ҷавонони баору номуси ноҳияи Исмоили Сомонӣ ҷиҳати иштироки онҳо дар чорабиниҳои сатҳи пойтахт ва ташаббусҳои неки онҳо барои  бартараф намудани мушкилоти ҷавонон дар ҷомеа изҳори хушҳолӣ намуд.
Дар фарҷоми ҳамоиш аз ҳисоби ҷавонони фаъоли ноҳия гурӯҳи таблиғотӣ таъсис дода шуд, ки ҳамарӯза дар маҳаллаву хиёбонҳо ва бозорҳои ноҳияи Исмоили Сомонӣ маводи таблиғотӣ тақсим хоҳанд кард.