Паҳлавони тоҷик дар Туркия соҳиби медали биринҷӣ гардид

Душанбе,10.05.2016/АМИТ «Ховар»/. Аз 6 то 8 май дар шаҳри Истанбули Туркия дувумин Мусобиқаи ҷаҳонии гӯштини тарзи озод баргузор шуд.
Дар дувумин мусобиқаи ҷаҳонии гӯштини тарзи озод барои дарёфти роҳхатҳо ба Бозиҳои тобистонаи олимпии соли 2016 дар Рио-де-Жанейрои Бразилия паҳлавони тоҷик Искандари Рустам соҳиби медали биринҷӣ гардид. Искандари Рустам дар рақобатҳо дар вазни то 97 кило баъди пирӯзӣ дар даври ҳаштякниҳоӣ бар варзишгари Албания Эгзон Шала бо ҳисоби 11:0 дар даври чорякниҳоӣ аз паҳлавони Муғулистон Худербулга Дорҷханд бо ҳисоби 0:11 шикаст хӯрд. Баъдан паҳлавони тоҷик бар Эдон Шала аз Косово бо ҳисоби 10:3 ғолиб омад ва барои медали биринҷӣ бо варзишгари Индонезия Маусам Хатрӣ мубориза бурд. Ҳисоб мусовӣ- 8:8 гардид. Ғолибият ба паҳлавони тоҷик дода шуд. Вале Искандари Рустам аз роҳхати олимпӣ маҳрум гардид, зеро ки 12 роҳхат дар риштаи гӯштини озод насиби варзишгароне гардид, ки дар вазни худ ҷойҳои 1-2-юмро гирифтанд. Дар ин мусобиқаи ҷаҳонӣ боз чор гӯштингири тоҷик оид ба гӯштини тарзи озод ширкат доштанд. Ҳикматулло Воҳидов дар вазни то 57 кило дар ҳаштякфинал Марсел Эвалди олмониро бо ҳисоби 8:4 шикаст дод, вале дар даври чорякниҳоӣ аз Кристоф Биенковскии лаҳистонӣ бо ҳисоби 2:4 мағлуб гашт.
Ҳ. Воҳидов барои медали биринҷӣ қувваозмоиро ба Ҷозеф Молнар аз Маҷористон бо ҳисоби 5:8 бохт.
Варзишгари дигари тоҷик Азамат Сӯфиев дар вазни то 74 кило дар даври муқаддамотӣ бар Макара Нгуон (Камбоҷа) бо ҳисоби 10:0 дастболо шуд, вале дар ҳаштякфинал аз Кристиан Брзозовски (Лаҳистон) бо ҳисоби 2:7 мағлуб гашт. Ду намояндаи дигари Тоҷикистон дар нахустин даври мусобиқа шикаст хӯрданд. Содиқхоҷа Исмоилов дар вазни 65 кило аз Ҳаислан Антонио Веранес Гарсия (Канада) ва Баҳодур Қодиров дар вазни то 86 кило аз Гванук Ким (Кореяи Ҷанубӣ) мағлуб шуданд.