Ҳаким Фузайлов, сармураббии тими мунтахаби Тоҷикистон: «Бангладеш ҳарифи сазовор аст»

Душанбе, 02.06.2016 /АМИТ «Ховар»/.Пеш аз бозии дастаҳои мунтахаби Тоҷикистон ва Бангладеш, ки имрӯз соати 20 дар варзишгоҳи марказии шаҳри Душанбе барпо мегардад, сармураббии дастаи мунтахаби Тоҷикистон Ҳаким Фузайлов дар нишасти матбуотӣ изҳор кард, ки бозӣ бо дастаи мунтахаби Бангладеш осон нест, вале футболбозони Тоҷикистон омодаанд ҳама имкониятро истифода баранд, то ба бозиҳои ниҳоии Ҷоми Осиё- 2017 роҳхатро ба даст оранд.  Капитани тими мунтахаби мамлакат Нуриддин Давронов низ дар тақвияти гуфтаҳои сармураббӣ омода будани бозингарон ба ин сабқати ниҳоят муҳимро иброз карда, гуфт: «Мо бояд аз он иштибоҳе, ки дар бозиҳои интихобии Ҷоми ҷаҳон- 2018 бо дастаи мунтахаби Бангладеш дар сафар роҳ дода будем(1:1), хулоса кунем ва 100 фоиз бозиро ба нафъи худ анҷом диҳем».
Сармураббии ҳолландии дастаи мунтахаби Бангладеш Людовик де Кройф, ки ба наздикӣ дар ин мақом Фабио Лопесро иваз кард, изҳор дошт, ки: «футбол дар Бангладеш намуди варзиши рақами аввал нест, аммо барои обрӯю нуфуз ва ривоҷи футбол дар ин кишвар мо бояд натиҷаи арзанда нишон диҳем».
Капитани тими мунтахаби Бангладеш Мамунул Ислом бохти соли гузаштаи дастаашонро (5:0) аз ҳавои боронӣ маънидод карда, иттилоъ дод, ки имрӯз дар варзишгоҳ ҳавои хуб дар назар аст ва онҳо ба дастаи мунтахаби Тоҷикистон муқобилияти сахт нишон хоҳанд дод.
Ёдовар мешавем,ки то имрӯз дастаҳои миллии Тоҷикистон ва Бангладеш бо ҳам 8 вохӯрӣ барпо кардаанд, ки дар панҷ бозӣ Тоҷикистон ва дар 1 вохӯрӣ Бангладеш ба ғалаба комёб шудаанд. Ду бозии дигар мусовӣ ҷамъбаст шудаанд.