Қоҳир Расулзода бо фаъолияти пойгоҳҳои обкашӣ ва вазъи корҳои соҳилмустаҳкамкунӣ дар ноҳияҳои минтақаи Кӯлоб шинос шуд

Июнь 14, 2016 17:10

Душанбе, 14.06.2016. /АМИТ «Ховар»/. Имрӯз Сарвазири мамлакат Қоҳир Расулзода дар ноҳияҳои минтақаи Кӯлоби вилояти Хатлон бо фаъолияти пойгоҳҳои обкашӣ ва вазъи корҳои соҳилмустаҳкамкунӣ шинос шуд.
Сарвазири мамлакат дар ноҳияи Фархор нахуст аз мавзеи пойгоҳи обкашии Урта-Боз -4 дидан кард. Ин пойгоҳ дорои  12 муҳаррики обкашӣ буда, дар се  қитъа масоҳати наздик ба 4 ҳазор гектар замини таъйиноти кишоварзиро бо об таъмин мекунад. Тавре иттилоъ дода шуд, обёрии заминҳо дар қитъаи якум аз моҳи апрели соли равон шуруъ гардида, барои фаъолияти пурраи пойгоҳи обкашӣ иваз намудани қисмҳои эҳтиётии муҳаррикҳои обрасони қитъаҳои дуюм ва сеюм  пеш омадааст. Масъулини соҳа барои сари вақт ба кор андохтани пойгоҳи обкашӣ бо иқтидори пурра ва дар муҳлатҳои наздик аз таъмир баровардани таҷҳизоти кории он вазифадор карда шуданд.
Сарвазири мамлакат Қоҳир Расулзода ҳамчунин дар ноҳияи Фархор бо ҷараёни корҳои соҳилмустаҳкамкунӣ дар мавзеи Сайёди деҳоти Даркад, ки дар масофаи беш аз 130 метр гузаронида мешаванд, шинос шуд. Дар ин мавзеъ, ки дар ноҳия минтақаи дорои хавфи бештар ба ҳисоб меравад тамоми тадбирҳо барои пешгирӣ аз ҳар гуна офатҳои табиии марбут ба об андешида мешавад.
Дар идомаи сафар Сарвазири мамлакат ва ҳайати ҳамроҳонаш бо ҷараёни корҳои соҳилмустаҳкамкунӣ дар мавзеи Чубеки ноҳияи Мир Сайид Алии Ҳамадонӣ шинос шуд. Тавре таъкид карда шуд, дар ин мавзеъ дар масофаи 537 метр  аз ҷониби Муассисаи давлатии «Маркази идораи лоиҳаи идоракунии захираҳои обии водии Фарғона» корҳои барқарорсозии саддҳои обгардон ба таври шабонарӯзӣ амалӣ гардида,  дар иҷрои ин корҳо се ташкилоти сохтмонии ватанӣ сафарбар шудаанд.
Ба гуфтаи масъулин, дар пешбурди корҳои соҳилмустаҳкамкунӣ дар ин мавзеъ мушкилоте набуда, иҷрочиёни лоиҳа  аз ҷониби Ҳукумати Ҷумҳурии Тоҷикистон бо масолеҳи зарурии сохтмонӣ, сӯзишворӣ ва техникаю таҷҳизоти корӣ таъмин карда шудаанд.
Дар айни замон дар ҳамин мавзеъҳои хавфноки наздик ба маҳаллаҳои аҳолинишин зиёда аз 2500 адад бетонсанги обгардон захира шуда, барои барқарорсозии ҳар як минтақаи харобгардида истифода бурда мешаванд.
Сарвазири мамлакат масъулини соҳа ва иҷрочиёни лоиҳаи корҳои соҳилмустаҳкамкунии мавзеи Сарбанд ва Боғбунёди деҳоти Чубекро барои иҷрои босифати корҳои соҳилмустаҳкамкунӣ, захираи пурраи масолеҳи сохтмонӣ, сӯзишворӣ, оҳан, симу бетонсангҳо, ташкили навбатдории шабонарӯзӣ ва афзун намудани техникаю таҷҳизоти корӣ вазифадор намуд.

Июнь 14, 2016 17:10

Хабарҳои дигари ин бахш

Бо гузашти 28 сол аҳамияти Ваҳдати миллӣ дар рушди иқтисодии Тоҷикистон бештар эҳсос мешавад
Фаъолияти иҷтимоӣ ва фарҳангӣ яке аз воситаҳои муассири таҳкими ваҳдати миллӣ мебошад
Муовини Раиси ноҳияи Данғара Зуҳро Ҳакимзода: «Мардум ба Пешвои миллат боварӣ ва эътимод дорад»
Тоҷикистон дар партави ваҳдати миллӣ ба сӯи шукуфоии нав қадам мегузорад
ВАҲДАТИ МИЛЛӢ — ПОЯИ ҲАСТИИ ДАВЛАТ ВА НЕРУИ СОЗАНДАИ МИЛЛАТ. Мулоҳизаҳои ректори Донишгоҳи давлатии Кӯлоб
Имрӯз дар Тоҷикистон ҳаво то 37 дараҷа гарм мешавад
Дар Вазорати адлия бахшида ба Рӯзи Ваҳдати миллӣ ҳамоиши идона доир гардид
Дар Агентии авиатсияи гражданӣ бахшида ба Рӯзи Ваҳдати миллӣ ҳамоиши тантанавӣ доир шуд
Кормандони Корхонаи воҳиди давлатии «Роҳи оҳани Тоҷикистон» Рӯзи Ваҳдати миллиро таҷлил намуданд
Бахшида ба Рӯзи Ваҳдати миллӣ омӯзгорони фаъоли пойтахт қадрдонӣ карда шуданд
Намояндагони ВАО бо хизматрасониҳои алоқаи барқӣ дар вилояти Суғд шинос мешаванд
Имрӯз дар шаҳри Душанбе ҳаво то 37 дараҷа гарм мешавад