Сатҳи таваррум дар моҳи май 0,2 фоиз коҳиш ёфт

Душанбе, 14.06.2016 /АМИТ «Ховар»/.   Тибқи маълумоти омори расмӣ, дар моҳи майи соли равон сатҳи таваррум раванди коҳишёбӣ дошта, ба 0,2 фоиз баробар шуд, ки нисбат ба моҳи қаблӣ 0,2 банди фоизӣ ва моҳи майи соли гузашта 0,1 банди фоизӣ камтар аст.
Мутобиқи мониторинги Бонки миллии Тоҷикистон дар моҳи майи соли равон арзоншавии нархи картошка, пиёз, карам, гӯшти гӯсфанд, гӯшти мурғ, шир, помидор, бодиринг, семент ва гази моеъ ба қайд гирифта шуд.
Ҳамзамон дар давоми моҳи ҳисоботӣ дар ҷумҳурӣ болоравии нархи миёнаи маҳсулоти полезӣ, биринҷ, нахӯд, мош ва маҳсулоти дорои хусусияти мавсимӣ, аз ҷумла сабзӣ, себ, нок, ангур, тухм ва шакар мушоҳида гардид.
Дар моҳҳои январ  майи соли равон нишондиҳандаи мазкур 2,7 фоизро ташкил дод, ки он аз ҳисоби саҳми нархҳои маҳсулоти хӯрокворӣ 1,3 фоиз, маҳсулоти ғайрихӯрокворӣ 0,8 фоиз ва хизматрасонии пулакӣ 0,6 фоиз ҳосил гардид.
Таварруми солона дар моҳи майи соли 2016 дар сатҳи 5,2 фоиз нигоҳ дошта шуд, ки нисбат ба ҳамин моҳи соли гузашта 0,3 банди фоизӣ паст мебошад.
Ба раванди мазкур дар баробари татбиқи сиёсати мутавозуни монетарию макроиқтисодӣ, пешниҳоди муътадили молу маҳсулот, бахусус зиёд гардидани истеҳсоли маҳсулоти кишоварзӣ (сабзавот ва меваҷот), инчунин сатҳи нисбатан пасттари даромадҳои иловагӣ ва талаботи истеъмолии аҳолӣ таъсир расонид.