«Табобат ба ҷои ҷазо»: Дар Душанбе масъалаҳои нашъамандӣ муҳокима гардиданд

Душанбе, 22.06.16. /АМИТ «Ховар»/. 22 июн дар арафаи Рӯзи байналмилалии мубориза бар зидди суиистеъмоли маводи нашъаовар ва муомилоти ғайриқонунии он дар Агентии назорати маводи нашъаовари (АНМН) назди Президенти ҶТ бо дастгирии дафтари Раёсати Созмони Милали Муттаҳид оид ба маводи нашъаовар ва ҷинояткорӣ суҳбат оид ба масъалаҳои нашъамандӣ дар мавзӯи «Табобат ба ҷои ҷазо» баргузор гардид.
Тавре ки ба АМИТ «Ховар» аз маркази матбуоти АНМН хабар доданд, мақсади асосии гузаронидани вохӯрӣ аз муттаҳид намудани кӯшишҳои ҳамаи сохторҳои манфиатдор дар созмон додани тамоюлҳои нав дар сиёсати зиддимухаддиротӣ бо назардошти ҳимояи ҳуқуқҳои гурӯҳҳои осебпазири аҳолии Тоҷикистон иборат буд.
Дар суҳбат муовини директори агентӣ М.Ҳайдарзода зикр намуд, ки сиёсати зиддимухаддиротии ҳукумати ҷумҳурӣ ба тақвият додани назорат аз болои маводи нашъаовар, мустаҳкам намудани иқтидори мақомоти ҳифзи ҳуқуқ ва сохторҳои қудратӣ равона карда шудааст. Бинобар ин, ҳамаи кӯшишҳоро ба мубориза бар зидди муомилоти ғайриқонунии маводи нашъаовар равона бояд кард, ҳамзамон ҳамкориро бо созмонҳои байналмилалӣ ва иттиҳодияҳои ҷамъиятӣ дар самти фаъолият бо гурӯҳҳои осебпазири аҳолӣ аз ҳисоби нашъамандон  ва беморони ВНМО ташкил намудан зарур аст.
Иштирокдорони вохӯрӣ масъалаҳоро вобаста ба чораҳои қиёсӣ, ки ба коҳиши талабот ба маводи нашъаовар ва расонидани кумак ба истеъмолкунандагони маводи нашъаовар равона гардидаанд, муҳокима намуданд.
Дар чорабинии мазкур муаррифиномаҳои ҳамаи идораҳои манфиатдор, инчунин андешаҳои намояндагони ташкилотҳои ҷамъиятӣ, ки бо масъалаҳои шахсони нашъаманд машғул мебошанд, пешкаш гардид.
Аз рӯи натиҷаи вохӯрӣ қатънома қабул гардид, ки дар он дар назди Агентии назорати маводи нашъаовари назди Президенти ҶТ таъсиси гурӯҳи корӣ оид ба омода сохтани механизми таҳияи амалии чораҳои қиёсӣ, инчунин муайян намудани ҳайати гурӯҳи корӣ аз ҳисоби коршиносони вазорату идораҳо, коркарди нақшаи корӣ, муайян намудани сарчашмаи маблағгузорӣ ва дастгирии техникӣ барои фаъолияти самараноки гурӯҳи корӣ пешбинӣ шудааст.