«Зан-роҳбар»: курсҳои омӯзишӣ барои занони хатлонӣ

Қурғонтеппа, 17.06.2016 /АМИТ Ховар/.  Дар маркази маъмурии  вилояти Хатлон-шаҳри Қурғонтеппа курси омӯзишии  «Зан-роҳбар» бо иштироки тамоми мудирони шуъбаву бахшҳои кор бо занон ва оилаи шаҳру ноҳияҳо баргузор гардид.
Дар  назди иштирокдорони чорабинӣ муовини раиси вилояти Хатлон, доктори илмҳои фалсафа, профессор Махфират Хидирзода  дар мавзӯи «Сарварӣ ҳамчун падидаи иҷтимоию сиёсӣ» ва «Имиҷи зан-роҳбар», мудири шуъбаи кадрҳои дастгоҳи раиси вилоят Маҳмадсабур Солиҳов  дар мавзӯи «Сиёсати кадрӣ- мақсад ва вазифаҳо» ва «Одоби хизмати давлатӣ», номзади илмҳои сиёсатшиносӣ, мудири кафедраи Донишкадаи идоракунии давлатии назди Президенти Ҷумҳурии Тоҷикистон Амид Комилбеков  дар мавзӯи «Менеҷменти нави давлатӣ»,  Марҳабо Олимӣ, муовини аввали раиси Кумитаи кор бо занон ва оилаи назди Ҳукумати Ҷумҳурии Тоҷикистон дар мавзӯи «Сиёсати гендерӣ, дастовардҳо ва дурнамо» ва «Дастурдиҳӣ оид ба пешбурди коргузорӣ ва иҷрои санадҳои меъёрӣ дар самти оила» сухан гуфтанд.
Инчунин  шунавандагон бо кори шуъба ва бахши кор бо занон ва оилаи мақомоти иҷроияи давлатии шаҳри Қурғонтеппа ва ноҳияи Бохтар шинос  шуданд.