Ҷамъбасти натиҷаҳои фаъолияти Кумитаи рушди маҳал дар нимсолаи якуми соли 2016

Душанбе, 12.07.2016. /АМИТ «Ховар»/.   Имрӯз таҳти роҳбарии Қосим Роҳбар, раиси  Кумитаи рушди маҳалли назди Президенти Ҷумҳурии Тоҷикистон  ҷаласаи ҳайати мушовара баргузор шуд.
Тавре аз Кумитаи рушди маҳалли назди Президенти Ҷумҳурии Тоҷикистон  хабар доданд, дар рафти ҷаласа самти омӯзиш ва таҳлили фаъолияти мақомоти идоракунии маҳаллӣ  ва тақвияти масъулияти онҳо дар ноҳияи Рӯдакӣ, ҳамчунин ҷамъбасти натиҷаҳои фаъолияти Кумитаи рушди маҳалли назди Президенти Ҷумҳурии Тоҷикистон дар нимсолаи якуми соли 2016 ва вазифаҳои минбаъдаи воҳидҳои сохтории Дастгоҳи марказии Кумита баррасӣ гардидаанд.
Раиси Кумита Қосим Роҳбар нисбат ба омӯзиш ва таҳлили фаъолияти мақомоти идоракунии маҳаллӣ, ки дар ноҳияи Рӯдакӣ гузаронида шуда буданд, баҳогузорӣ намуда,  иброз дошт, ки имрӯз барои ҳалли мушкилиҳои пешомада зарурати ҳамоҳангсозии фаъолияти  кумита бо мақомоти идоракунии маҳаллии ноҳияи Рӯдакӣ  пеш омадааст, ки минбаъд фаъолияти мақомоти мазкур ба таври шаффоф арзёбӣ карда шавад. Дар оянда дар назди тамоми раисони ҷамоатҳои ноҳияи Рӯдакӣ бо истифода аз слайдҳо бо назардошти тавсия ва хулосаҳо машваратҳо гузаронида шаванд, ки мақсади асосӣ гузаронидани ислоҳот дар сохтор мебошад. Аз ин рӯ, самти фаъолият бояд он мақсад ва вазифаҳоеро муайян намояд, ки дар заминаи дастуру супоришҳои Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон асос ёфта, дар пешрафти мақомоти идоракунии маҳаллии кишвар саҳми босазо гузорад.
Ҳамзамон, Қосим Роҳбар аз рӯйдодҳои сиёсии семоҳаи дуввуми соли равон оид ба омодагӣ ва баргузории раъйпурсии умумихалқӣ барои ворид намудани тағйироту иловаҳо ба Конститутсияи Ҷумҳурии Тоҷикистон, ки 22 майи соли равон ба вуқӯъ омад ва чорабиниҳои тантанавӣ бахшида ба 19-умин солгарди Рӯзи Ваҳдати миллӣ, ки 27 июни  соли равон  дар Вилояти Мухтори Кӯҳистони Бадахшон дар сатҳи баланд ҷашн гирифта шуд, саҳми кормандони кумитаро дар ин чорабиниҳои сиёсӣ дар алоҳидагӣ ёдовар шуд.
Қосим Роҳбар ҷамъбасти натиҷаҳои фаъолияти Кумитаи рушди маҳалли назди Президенти Ҷумҳурии Тоҷикистон дар нимсолаи якуми соли 2016- ро муҳокима намуда, вобаста ба вазифаҳои минбаъда ба воҳидҳои сохтории Дастгоҳи марказии кумита дастуру супоришҳо дод.