Ба Маркази вилоятии бемориҳои руҳии шаҳри Кӯлоб кумак расонида шуд

Кӯлоб, 07.07.2016 /АМИТ «Ховар»/. Бо дастгирӣ аз иқдоми Асосгузори сулҳу Ваҳдати миллӣ — Пешвои миллат, Президенти мамлакат муҳтарам Эмомалӣ Раҳмон барои расонидани кумак ба оилаҳои ниёзманд, ятимону бепарасторон ва шахсони яккаву танхо дар арафаи иду ҷашнҳо кормандони корхонаю ташкилот, хизматчиёни давлатӣ, соҳибкорону шахсони саховатпеша ба ин қишри ҷомеа кумаки яквактаи иқтисодӣ мерасонанд. Дар ҳамин замина дар арафаи Иди саиди Фитр дар шаҳри Кӯлоб ба табобатгирандагони Маркази вилоятии бемориҳои руҳии шаҳри Кӯлоб кумак аз қабили орду равған, картошкаю пиёз, афшураю дигар намуди маводи хӯрока расонида шуд.
Тавре муовини раиси шаҳри Кӯлоб Саймурод Исмоилзода иттилоъ дод, дар ҳамин рӯз кумаки иқтисодӣ, аз қабили орду равған, шакару биринҷ, картошкаю пиёз ва сабзавот ба 10 нафар шахсони яккаву танҳо, ки дар қайди муассисаи кумаки иҷтимои дар шаҳри Кӯлоб мебошанд, расонида шуд.  Ниёзмандон барои расонидани чунин кумакҳои пайваста ба ҳокимияти давлатӣ ва шахсони саховатпеша изҳори миннатдорӣ намуда, баҳри пешрафту тараққиёт ва гулгулшукуфии Ватани азиз даст ба дуо бардоштанд.