Дар ҷумҳурӣ истеҳсоли моҳӣ кам шудааст

Душанбе, 21.07.2016. /АМИТ «Ховар»/.  «Дар ҷумҳурӣ зиёда аз 250 хоҷагии деҳқонии моҳипарварӣ  фаъолият доранд ва истеҳсоли моҳӣ аз рӯи ҳосилнокӣ нисбат ба солҳои пешин кам гардидааст»,- гуфт зимни нишасти матбуотӣ сардори КВД «Моҳии тоҷик» Аҳмадҷон Ғафуров.
Сабаби  аслии кам истеҳсол  шудани моҳиро Аҳмадҷон Ғафуров  дар омехта будани хӯроки моҳӣ ва гарон будани нархи об дониста, иброз дошт, ки дар шаш моҳи соли равон дар ҷумҳурӣ 348,3 тонна моҳӣ истеҳсол карда шудааст.
Соли 2008 баъд аз қабул гардидани «Барномаи  рушди  соҳаи моҳипарварӣ» шумораи хоҷагиҳои моҳипарварӣ  аз 7 ба 250 адад расонида шуд ва барои рушди минбаъдаи ин соҳа аз Федеретсияи Русия кирминамоҳича ворид гардид.
Ҳоло дар ҶСК «Моҳии тоҷик»-и ноҳияи Бобоҷон Ғафуров навъҳои гуногуни моҳиҳо парвариш ёфта, дар оянда барои таъмин намудани моҳиҳои хушзот истифода мешаванд.