«Файзи истиқлол» ба рушди театрҳои халқӣ мусоидат хоҳад кард

Душанбе, 07.07.16. /АМИТ «Ховар»/. Дар ҷумҳурӣ фестивал озмуни ҷумҳуриявии Театрҳои халқӣ таҳти унвони «Файзи истиқлол» ҷамъбаст гардид.
Тавре ба АМИТ «Ховар» аз маркази матбуоти Вазорати фарҳанг хабар доданд, фестивал-озмуни «Файзи истиқлол» ба муносибати 25-солагии Истиқлолияти давлатии Ҷумҳурии Тоҷикистон аз ҷониби Вазорати фарҳанг бо мақсади тақвияти фаъолияти нақши театрҳои ҳалқӣ ва маҳфилҳои драмавии шаҳру ноҳияҳои мамлакат дар тарбияи ҳисси ватандӯстии насли наврас ва баланд бардоштани қадру манзалати театрҳои халқӣ гузаронида шуд.
Дар маҷмӯъ дар чорабинӣ, ки таи се моҳи охир давом дошт, 23 театрҳои халқӣ дар маркази вилоятҳо ва шаҳру ноҳияҳои тобеи ҷумҳурӣ намоиши худро пешкаши тамошобинон намуданд. Мувофиқи талаботи фестивал-озмун он намоишҳое манзури тамошобинон гардиданд, ки ба мақсад ва номи чорабинӣ мувофиқат кунанд.
Ба муносибати 25-солагии Истиқлолияти давлатӣ 17 нафар иштирокчиёни фаъоли фестивал-озмуни ҷумҳуриявии театрхои халқӣ аз тамоми гӯшаи кишвар бо нишони сарисинагии «Аълочии фарҳанги ҷумҳурии Тоҷикистон» ва ифтихорномаи Вазорати фарҳанги Ҷумҳурии Тоҷикистон мукофотонида хоҳанд шуд.