Хатлон: Маҳфили «Донандагони таърих» ва «Таърихчиёни ҷавон»

Душанбе, 15.07.2016. /АМИТ «Ховар»/. 12 июли соли 2016 дар толори Осорхонаи таърихӣ- кишваршиносии вилояти Хатлон ба номи «Авесто» бо иштироки аъзои маҳфилҳои доимоамалкунандаи «Донандагони таърих» ва «Таърихчиёни ҷавон» ба истиқболи 25-солагии Истиқлолияти давлатии Ҷумҳурии Тоҷикистон мизи мудаввар баргузор гардид.
Роҳбарияти осорхона аз натиҷаҳои назаррасе, ки дар давоми солҳои соҳибистиқлолии кишвар ин даргоҳи махзани ёдгориҳои бостонӣ ба он ноил гардидааст, ёдовар шуда, иброз дошт, ки муҳити созандаву созгори солҳои охир дар осорхонаи вилоятӣ роҳандозишудаистодаро татбиқи мантиқии сиёсати хирадмандонаи Асосгузори сулҳу Ваҳдати миллӣ- Пешвои миллат, муҳтарам Эмомалӣ Раҳмон ва омили асосии ноил гардидан ба пешбурди кори таълиму тарбия ва илм дар ин макони таърихӣ ҳисобидан мумкин аст.
Дар раванди чорабинӣ кормандон ва иштирокчиёни мизи мудаввар баромад намуда, бори дигар аз пешравиҳо ва дастовардҳои ҷавонон, ғамхориҳои Ҳукумати мамлакат нисбат ба насли ҷавон ва дастгириҳои ҷавонон дар давоми солҳои соҳибистиқлолии кишвар  ибрози андеша намуданд.
Дар анҷоми чорабинӣ роҳбаладон ва ходимони илмии осорхона ба иштирокчиёни мизи мудаввар сайри гӯшаҳои таърихии осорхона ташкил намуда, оид ба нигораҳои гирдовардашуда ба тамошобинон маълумоти муфассал пешкаш намуданд.