Нома ба АМИТ «Ховар»: «Мо ифтихор мекунем, ки Ҳукуматамон нисбат ба шаҳрвандони худ ғамхор аст…»

Душанбе, 19.07.2016 / АМИТ «Ховар» /. Ба суроғаи АМИТ «Ховар» аз Наима Норматова номае бо чунин мазмун расид: «Мехоҳам ба Ҳукумати ҶТ, бавижа ба Вазорати корҳои хориҷии ҶТ ва кормандони Консулгарии Тоҷикистон дар Туркия барои вокуниши фаврӣ ва дастгирии кӯдакони мо, шаҳрвандони Ҷумҳурии Тоҷикистон дар шароити баамаломада изҳори сипос ва миннатдорӣ намоям.
Шаби ҷумъаи 16 июли соли 2016, кӯдакони мо дар ҳайати гурӯҳи туристӣ (16 нафар) ба фурудгоҳи ба номи Отатурки шаҳри Истанбул барои идомаи сафар то Кипр расиданд ва бо вазъияти мушкиле вобаста ба табадуллоти давлатӣ бархӯрданд. Вақте ки тамоми алоқа қатъ карда шуд ва иттилооти боэътимод вуҷуд надошт, мо бо ВКХ ҶТ тамос гирифтем ва навбатдор бо эҳтиром ба ҳарфҳои мо гӯш карда, моро бо иттилооти дастрас оид ба вазъият огоҳ намуда, хабар дод, ки ин масъала дар назорати махсуси вазири ВКХ мебошад.
Таи ин муддат кӯдакони мо дар фурудгоҳи шаҳри Истанбул қарор доштанд ва намояндагони Консулгарии Тоҷикистон дар Туркия дар ҳалли ин масъала ҳамаҷониба мусоидат намуда, имконияти фиристодани онҳо ба Кипр ё баръакс ба Ватанро мавриди баррасӣ қарор доданд. Ҳамчунин алоқаи мунтазами кӯдакон бо волидайн ва ташкили хӯроки гармро таъмин намуданд. Дастгирии маънавии волидайн ва мувозибат нисбати фарзандони мо эҳсос мегардид.
Мо бори аввал бо чунин вазъият дучор омадем ва ифтихор менамоем, ки Ҳукумати мо нисбат ба сарнавишти шаҳрвандони худ, ки берун аз кишвар қарор доранд, ғамхорӣ менамояд».
Бо эҳтиром, Наима Норматова ва 15 имзои дигар