Пешвои миллат: «Дастархони маънавӣ ороем»

Душанбе, 05.07.2016 /АМИТ «Ховар»/. «Мехоҳам таъкид намоям, ки мо бояд ҳангоми гузаронидани маъракаҳои милливу динӣ, аз ҷумла иди Фитр, ҳамеша сарфаю сариштакор бошем, ба намоишкориву исрофкорӣ роҳ надиҳем ва ба ҷои оростани дастархони серхарҷу пурдабдаба дастархони маънавӣ ороем», — омадааст дар Паёми телевизионии Пешвои миллат муҳтарам Эмомалӣ Раҳмон ба муносибати Иди Рамазон, ки субҳи имрӯз ба сокинони мамлакат ироа гардид.
Таҳти мафҳуми дастархони маънавӣ Сарвари давлат, Президенти мамлакат Эмомалӣ Раҳмон анҷом додани амалҳои нек, панду насиҳати наврасону ҷавонон, кумак ба ятимону маъюбон, оилаҳои камбизоат ва дигар корҳои хайрро талқин намуда, дар Паёми телевизионӣ чунин изҳор кардааст: «Тамоми мардуми Тоҷикистони азизамонро ба муносибати фаро расидани иди саиди Фитр табрик гуфта, ба хурду бузурги кишвари соҳибистиқлоламон тандурустиву хушбахтӣ, ризқу рӯзии фаровон, имони комил ва ободиву рушди Ватани азизамонро орзу менамоям».
Хотиррасон мешавем, ки пагоҳ дар Тоҷикистон Иди саиди фитр ҷашн гирифта мешавад. Қонунгузории Тоҷикистон ҳар ду иди бузурги мусулмонони ҷаҳон Иди фитр ва Иди қурбонро ҳамасола мутаносибан ба рӯзҳои омаданашон рӯзҳои истироҳатӣ муқаррар кардааст.