Ҳукми зиндон барои Мессӣ ва падари ӯ ба мӯҳлати 21 моҳ

Душанбе, 7.07.2016 /АМИТ «Ховар»/. Футболбози рақами яки ҷаҳон Лионел Мессӣ бо ҷурми сарпечӣ аз пардохти андоз дирӯз ба 1 солу 9 моҳи зиндон аз ҷониби додгоҳи шаҳри Барселона маҳкум шуд . Ба падари ӯ Хорхе Мессӣ низ бо ҳамин далоил ҳукми зиндон раво дида шудааст.
Дар Испания тибқи қонунҳои марбута , агар ҳукми зиндон то 2 сол муайян шуда бошад, онро метавон ба сурати шартӣ адо кард. Ин ба маъноест, ки бо вуҷуди судури ҳукми зиндон барои Лионел Месси ва падари ӯ онҳо ба зиндон намераванд. Падару писар имкон доранд аз ҳукми додгоҳи Барселона ба додгоҳи олии Испания шикоят баранд.
Леонел Мессӣ ва падараш аз ҷониби додгоҳ мутаносибан ба маблағи  2 миллион евро ва  1,5 миллион евро муҷозот шуданд.
Ёдрас мешавем, ки Мессӣ ва падари ӯ барои пинҳон кардани даромади худ аз андоз ба маблағи 4,1 миллион евро мутаҳам мешаванд. Ҳарчанд соли гузашта дар ин маврид Лионел Мессиро сафед карда буданд, аммо интиқоли маблағҳо барои ду бозии дӯстона аз ҷониби Хазинаи хайриявии ӯ, ки ба дӯсташ Гилермо Марин номнавис шуда буданд, шӯру мағалро аз нав ба миён овард.
Дар ҷаҳони варзиш чунин далелҳои манфӣ атрофи варзишгарони маъруфу номӣ хеле зиёд ба чашм мерасанд.