Рашт: «Корвони саломатӣ» беморшавии аҳолиро пешгирӣ мекунад

Душанбе, 03.08.2016. /АМИТ «Ховар»/. Бахшида ба 25-солагии Истиқлолияти давлатӣ бо дастгирии Ҳукумати Ҷумҳурии Тоҷикистон «Корвони саломатӣ» аз ҳисоби табибони ботаҷриба ташкил карда шудааст, ки ба минтақаҳои дурдасти кишвар сафар намуда, ба сокинон хизматрасониҳои ройгони тиббиро мерасонанд. Ҳадафи «Корвони саломатӣ» пешгирии беморшавии аҳолӣ ва баланд бардоштани маърифати тиббии мардум мебошад.
Ин навбат «Корвони саломатӣ» ба навоҳии Рашт, Лахш ва Сангвор таҳти роҳбарии муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Насим Олимов сафар намуд. Дар «Корвони саломатӣ» табибону мутахассисони касбии муассисаҳои тиббии ҷумҳурӣ шомил буда, машварату хизматрасониҳои гуногуни тиббиро манзури аҳолии минтақа гардониданд. Табибони соҳаҳои гуногуни тиб, аз қабили асабшинос, амрози занон, дилшинос, эндокринолог ва ҷарроҳон бо мошини муҷаҳҳаз бо дастгоҳҳои рентгении рақамӣ, фаросадоӣ, сабти барқии дил ва дигар таҷҳизоти  тиббӣ аҳолии ин минтақаҳоро аз ташхису муоинаи тиббӣ гузарониданд.
Бино ба иттилои сардухтури Беморхонаи марказии ноҳияи Рашт Алимаҳмад Солиев, дар ноҳияи Рашт табибон беш аз ду ҳазор нафарро аз ташхису табобат гузаронида, 10 сокини ноҳияи Раштро ҷарроҳӣ карданд.