БМТ барои баланд бардоштани донишу малакаи мутахассисон семинари омӯзишӣ доир кард

Душанбе, 19.09.2016 /АМИТ «Ховар»/. Бо ташаббуси Пажӯҳишгоҳи илмӣ-тадқиқотӣ ва бозомӯзии кормандони Бонки миллии Тоҷикистон (БМТ) дар ҳамбастагӣ бо Маркази ҳамкории техникии «Дойч Бундесбонк» (Олмон) бо бонкҳои марказӣ, дар доираи барномаи таълимӣ семинари омӯзишӣ дар мавзӯи «Ташкили бозори пардохтпазири дараҷаи дуюм барои вомбаргҳои давлатӣ дар Тоҷикистон» баргузор гардид.
Семинари мазкур дар Бонки миллии Тоҷикистон барои мутахассисони дастгоҳи марказӣ ва ташкилотҳои қарзии ҷумҳурӣ, аз ҷумла, БДА ҶТ «Амонатбонк», ҶСП «Спитамен Бонк», ҶСП «Казкоммертсбонк Тоҷикистон», ҶСП «Бонки байналмилалии Тоҷикистон», ҶСК «Ориёнбонк», ҶСП «АксессБонк», ҶСК «Соҳибкорбонк», ҶСП «Бонки рушди Тоҷикистон», ҶСК «Бонки Эсхата» ва ҶСП «Аввалин бонки молиявии хурд» доир гардид.
Дар семинар ба иштирокдорон аз ҷониби мутахассисони Маркази ҳамкории техникии «Дойч Бундесбонк бо бонкҳои марказӣ» Томас Госвин ва Наталия Можаева-Ҳенлайн оид ба таҳияи тартиби холгузорӣ барои баҳодиҳии қарз бо истифодаи низоми «The Digital Switch ва The Discriminant Function», ҳисоб кардани коэффитсиентҳои молиявӣ ва ташкили бозори пардохтпазирии дараҷаи дуюм барои вомбаргҳои давлатӣ бо овардани мисолҳо маърӯзаҳо хонда шуда, дарсҳои назариявӣ бо корҳои амалӣ таҷрибаандӯзӣ гаштанд.
Бояд гуфт, ки ҳадафи семинари мазкур тавассути омӯзиши таҷрибаи пешқадами бонкҳои марказии кишварҳои Аврупо, аз ҷумла Ҷумҳурии Федеролии Олмон, баланд бардоштани донишу малакаи кории мутахассисони низоми бонкии Ҷумҳурии Тоҷикистон мебошад.