Дар Ню-Йорк ташаббуси нави Президенти Ҷумҳурии Тоҷикистон оид ба эълони Даҳсолаи байналмилалии «Об барои рушди устувор» мавриди баррасӣ қарор гирифт

Душанбе, 13.09.2016. / АМИТ «Ховар» /. 8 сентябри соли 2016 дар шаҳри Ню-Йорк ҷаласаи васеи Гурӯҳи «Дӯстони об» бо иштироки беш аз 70 намояндагии доимии давлатҳои аъзои Созмони Милали Муттаҳид баргузор гардид.
Бино ба маълумоти ВКХ Тоҷикистон, дар ҷараёни мулоқот масъалаҳои ҷаҳонии оби рӯзномаи ҷаласа, аз ҷумла масъалаи пешбурди ташаббуси нави Президенти Ҷумҳурии Тоҷикистон Эмомалӣ Раҳмон оид ба эълони Даҳсолаи байналмилалии «Об барои рушди устувор» мавриди баррасӣ қарор гирифтанд.
Аъзои гурӯҳи «Дӯстони об», ки қаблан дар Симпозиуми «Таъмини дастрасии универсалӣ ба об ва беҳдошт» (9-11августи соли 2016, ш. Душанбе) иштирок карда буданд, ба Ҳукумати Ҷумҳурии Тоҷикистон барои муваффақона гузаронидани ин чорабинӣ арзи сипос намуданд.