Иди асал дар «Пойтахт-90». Асалпарварони беҳтаринро мукофот интизор аст

Душанбе, 7.09.2016. /АМИТ «Ховар»/. Ба ифтихори 25-солагии Истиқлолияти давлатии Ҷумҳурии Тоҷикистон дирӯз дар Маркази савдои «Пойтахт-90» Иди асал баргузор гардид. Дар он занбӯрпарварон аз тамоми гӯшаҳои кишвар, хусусан аз вилояти Хатлон, Суғд ва ноҳияҳои тобеи ҷумҳурӣ ширкат варзида, беҳтарин намудҳои асалро ба намоиш ва фурӯш гузоштанд. Инчунин хӯрок ва шириниҳои миллии аз асал омодашуда, намунаҳои ҳунарҳои мардумӣ низ пешкаши меҳмонон ва сокинони пойтахт гардонида шуданд.
Дар намоишгоҳ муовини вазири кишоварзии Ҷумҳурии Тоҷикистон Нусратулло Мусоев сухан карда, доир ба рушди соҳаи занбӯрпарварӣ дар 25- соли Истиқлолияти давлатии ҶТ маълумот дод.
Иди асал бо ибтикори Вазорати кишоварзии Ҷумҳурии Тоҷикистон доир гардида, он то 10 сентябри соли равон идома меёбад ва асалпарварони беҳтарин бо мукофот ва ифтихорнома қадрдонӣ карда мешаванд.