Конибодом: Гар дасти фитодае бигирӣ, мардӣ!

Душанбе, 13.09.2016. /АМИТ «Ховар»/. Роҳбарияти Раёсати кишоварзии шаҳри Конибодом дар рӯзҳои таҷлили ҷашни 25-солагии Истиқлолияти давлатӣ    шахсони камбизоату табақаҳои эҳтиёҷманд ва яккаву танҳоро аёдат карданд. Вакилони Маҷлиси шаҳрӣ Валиҷон Азимов ва Рауфҷон Бобоҷонов ба беморони маркази равоншиносии шаҳри Конибодом маводи озуқа, аз қабили маҳсулоти хӯрокворӣ ва меваҷот расониданд. Роҳбарият ва табобатгирандагони марказ аз ин ташаббуси  кишоварзони шаҳр шод гашта, миннатдорӣ баён намуданд.
Муовини раиси шаҳри Конибодом Илҳомҷон Ҳомидов низ якчанд нафар собиқадорони меҳнат ва шахсони барӯманди шаҳрро аёдат карда, ба онҳо туҳфаҳои раиси вилояти Суғд Абдураҳмон Қодириро супорид.
Собиқадорон аз ғамхориву дастгириҳои давлат изҳори қаноамандӣ намуда, баҳри шукуфоии диёр ва ҳаёти тинҷу осудаи халқ дуо карданд.
Чунин аёдату дидорбиниҳо давом доранд.