Рӯзи мошинсозон: Рушди бахшҳои гуногуни иқтисоди миллӣ ҳадафи асосии соҳаи мошинсозӣ аст

Сентябрь 30, 2016 16:10

Душанбе, 30.09.2016 /АМИТ «Ховар»/. Ҳар сол якшанбеи охири моҳи сентябр дар ҷумҳурӣ Иди касбии мошинсозон ҷашн гирифта мешавад.
Дар ҳама давр аз фаъолияти самараноки корхонаҳои соҳаи мошинсозӣ, дараҷаву сатҳи тараққиёт ва сифати таҷҳизоти истеҳсолии соҳа, рушди соҳаҳои гуногуни иқтисодиёти ҳар кишвар баҳогузорӣ карда мешавад.
Дар раванди рушди бахшҳои гуногуни иқтисоди миллӣ, идома додани татбиқи барномаҳои соҳавӣ дар бахшҳои афзалиятноки он, хусусан саноат, бунёд ва ба истифода додани иқтидорҳои нави истеҳсолӣ дар асоси технологияи муосир бо коркарди бештари ашёи хоми ватанӣ, истеҳсоли маҳсулоти рақобатпазир минбаъд низ ҳадафи асосию афзалиятноки соҳаи мошинсозӣ ҳисобида мешавад.
Таҳлили вазъи соҳаи мошинсозии ҷумҳурӣ ва ҳаҷми истеҳсоли маҳсулоти соҳа тибқи маълумоти расмии оморӣ нишон медиҳад, ки дар ҳама бахшҳои соҳа тамоюли барқароршавии иқтидорҳои истеҳсолӣ ва афзоиши ҳаҷми истеҳсоли маҳсулот ба назар мерасад.
Тавре аз Вазорати саноат ва технологияҳои нави Ҷумҳурии Тоҷикистон ба АМИТ «Ховар» хабар доданд, корхонаҳои ин соҳа дар давоми 8 моҳи соли 2016, дар маҷмӯъ ба маблағи 731,2 млн. сомонӣ маҳсулот истеҳсол намудаанд. Ҳаҷми маҳсулоти истеҳсолшудаи соҳа дар ин давра назар ба ҳамин давраи соли 2015-ум 138,1 млн. сомонӣ зиёд мебошад. Суръати афзоиш дар ин давра 123,3 фоиз таъмин карда шуд.
Дар ин самт сол то сол корхонаҳои хурду миёна маҳсулоти ивазкунандаи воридот, ба монанди ноқилҳои мисию алюминии рӯйпўшкардашуда, сендвич панелҳо, профилҳои рўйпӯшкардашудаи алюминӣ, профилҳои металлии чоркунҷашакл ва даврашакл, обгармкунакҳои (термекс) тамғаи «Хопсон», маводи таркандаи саноатии эмулсионӣ, мошинолотҳои кишоварзӣ, лампаҳои каммасрафи диодӣ ва ғайраро истеҳсол намуда истодаанд.
Дар ҳашт моҳи соли 2016 корхонаҳои соҳаи мошинсозӣ, мудофиа ва химия, маҳсулоти алюминияи аввалия, маводи таркандаи саноатӣ, маҳсулоти алюминӣ, ноқилҳои рўйпўшшуда ва аккумуляторҳои истифодашударо ба маблағи 337,2 млн. сомонӣ ба хориҷи кишвар, хусусан ба давлатҳои Аврупо, Афғонистон, Эрон, Қазоқистон ва Ўзбекистон содирот намуданд, ки назар ба ин давраи соли гузашта, 72,2 млн. сомонӣ зиёд мебошад. Бояд зикр намуд, ки номгўи маҳсулот ва ҳаҷми содироти маҳсулоти соҳа ҳамасола рў ба афзоиш дорад.
Соҳаи мошинсозии ҷумҳурӣ рӯ ба рушд ниҳодааст ва бо бартараф гардидани буҳрони молиявӣ ба соҳа сармояи дохиливу хориҷӣ ҷалб гардида, дар мадди аввал ҳаҷми истеҳсоли маҳсулоти ивазкунандаи воридотӣ зиёд карда мешавад. Роҳандозии лоиҳаҳои афзалиятноки соҳаи мошинсозӣ бо назардошти рушди иқтисоди миллӣ дар доираи «Барномаи миёнамуҳлати рушди Ҷумҳурии Тоҷикистон барои солҳои 2016-2020» амалӣ карда шуда, маҳсулоти рақобатпазир дар бозори дохилӣ ва ба содирот нигаронидашуда истеҳсол мегарданд.

Сентябрь 30, 2016 16:10

Хабарҳои дигари ин бахш

Кормандони Кумитаи ҳолатҳои фавқулода ва мудофиаи гражданӣ 20 нафарро аз ғарқшавӣ наҷот доданд
Дар марказҳои саратоншиносии Тоҷикистон низоми муосири бойгонӣ ва интиқоли аксҳои рентгенӣ татбиқ гардид
НИШАСТИ МАТБУОТӢ. Дар ноҳияи Рӯдакӣ беш аз 10 ҳазор ариза барои гирифтани замин дар баррасӣ қарор дорад
5 август дар Суди Олии иқтисодӣ, Хадамоти иҷро, Маркази тадқиқоти стратегӣ, «Амонатбонк» ва Маркази миллии тестӣ нишасти матбуотӣ баргузор мегардад
Дар заминҳои соҳили дарёи Зарафшон ва мавзеи Киштӯдак 1350 бех ниҳоли павловния парвариш карда мешавад
«Интернет барои хона» ҳудудҳои навро дар Душанбе фаро мегирад
Дар шаҳри Панҷакент ҳашари экологии «Тозагии маҳал» гузаронида шуд
Имрӯз дар Тоҷикистон ҳаво тағйирёбандаи бебориш мешавад
ТАҚВИМИ АМИТ «ХОВАР»: имрӯз 4 август, душанбе, 216-умин рӯзи соли 2025 аст
Имрӯз дар Кумитаи ҳолатҳои фавқулода ва мудофиаи гражданӣ, Агентии инноватсия ва технологияҳои рақамӣ, Хадамоти зиддиинҳисорӣ ва Ваколатдор оид ба ҳуқуқи инсон нишасти матбуотӣ баргузор мегардад
Кумитаи рушди сайёҳӣ бахшида ба Рӯзи ҷаҳонии сайёҳӣ озмун эълон менамояд
Дар Хоруғ даври шаҳрии Озмуни ҷумҳуриявии «Беҳтарин ҳамсар» баргузор гардид