Ҷаласаи Шўрои рушди тарбияи ҷисмонӣ ва варзиши вилояти Хатлон бунёди иншоот ва майдончаҳои варзиширо зарур хонд

Қӯрғонтеппа, 19.10.2016 /АМИТ «Ховар»/. Дар шаҳри Қӯрғонтеппа ҷаласаи Шўрои рушди тарбияи ҷисмонӣ ва варзиши мақомоти иҷроияи ҳокимияти давлатии вилояти Хатлон таҳти роҳбарии раиси Шўро, муовини раиси вилояти Хатлон Махфират Хидирзода баргузор гардид. Дар ҷаласа гузориши котиби Шўрои рушди тарбияи ҷисмонӣ ва варзиши мақомоти иҷроияи ҳокимияти давлатии вилояти Хатлон, мудири бахши варзиши раёсати ҷавонон, варзиш ва сайёҳии вилоят Музаффар Ҳукматуллоев шунида шуд.

Инчунин раисони Шўрои рушди тарбияи ҷисмонӣ ва варзиши мақомоти иҷроияи ҳокимияти давлатии ноҳияҳои Темурмалик, Дўстӣ, Мўъминобод ва Бохтар оид ба корҳои анҷомдода маълумот доданд.
Дар ҷаласа оид ба зарурати бунёди иншоот ва майдончаҳои варзишӣ дар шаҳру ноҳияҳои вилояти Хатлон ва ҳудуди ҷамоатҳои шаҳраку деҳот, ҷудо кардани замин барои иншооти варзишӣ сухан рафта, таъкид гардид, ки дар ин самт бояд корҳоро ба таври фаъол роҳандозӣ кард.