Мусобиқаи «Ҷоми Президенти Ҷумҳурии Тоҷикистон» имрӯз дар шаҳри Ваҳдат соати 15-00 оғоз мегардад

Душанбе, 05.10.2016. /АМИТ«Ховар»/. Имрӯз соати 15-00 дар шаҳри Ваҳдат мусобиқаи байналмилалӣ оид ба дзюдо барои дарёфти «Ҷоми Президенти Ҷумҳурии Тоҷикистон» доир мегардад. Тавре ки аз Федератсияи дзюдои Тоҷикистон иттилоъ доданд, мусобиқоти байналмилалӣ дар риштаи гӯштини дзюдо барои дарёфти «Ҷоми Президенти Ҷумҳурии Тоҷикистон» шурӯъ аз соли 2013 гузаронида шуда, се мусобиқаи пешин дар пойтахти кишвар баргузор шуда буданд.
Имсол дар мусобиқаи байналмилалӣ оид ба дзюдо барои дарёфти «Ҷоми Президенти Ҷумҳурии Тоҷикистон» варзишгарони Тоҷикистон, Ҷопон, Амрико, Куба, Непал, Покистон, Афғонистон, Эрон, Беларус, Русия, Италия, Мисри Араб, Украина, Ӯзбекистон, Қазоқистон, Қирғизистон ва Озарбойҷон ширкат меварзинд.
Ёдовар мешавем, ки маблағи ҷоизаи мусобиқаи мазкур 15 ҳазор доллари ИМА-ро ташкил дода, ғолиби ҷои аввали мусобиқа бо 7 ҳазор доллар, зинаи дуюм — бо 4 ҳазор ва зинаи сеюм — бо 2 ҳазор доллари ИМА қадрдонӣ мешаванд.