Тавсеаи ҳамкории гумрукии Тоҷикистону Эрон дар меҳвари мулоқоти Каримзода бо Карбосиён

Душанбе, 20.10.2016/АМИТ «Ховар»/.  Масъалаи тақвияти ҳамкорӣ байни мақомоти  гумруки Тоҷикистон ва  Эрон  дар мулоқоти  Хуршед Каримзода, муовини аввали сардори Хадамоти гумруки назди Ҳукумати Ҷумҳурии Тоҷикистон ва Масъуд Карбосиён, раиси кулли мақомоти гумруки  Эрон дар Теҳрон баррасӣ гардид.
Мусоҳибон ҳамзамон масоили марбут ба тавсеаи ҳамкории дуҷониба дар бахшҳои мубодилаи иттилооти оморӣ ва электронӣ, омӯзиш ва табодули таҷриба ва фаъолсозии имкониятҳои рушди равобити  иқтисодию тиҷоратиро муҳокима намуданд.
Зикр шуд, ки аз ҷониби мутахассисони ҳарду кишвар лоиҳаи «Ёддошти тафоҳум оид ба амалӣ намудани Созишномаи дутарафа байни Ҳукумати Ҷумҳурии  Тоҷикистон ва Ҷумҳурии Исломии Эрон дар бораи ёрии байниҳамдигарии идорӣ оид ба иҷрои дурусти қонунгузории гумрукӣ барои пешгирӣ, таҳқиқ ва мубориза бо қонуншиканиҳои гумрукӣ»  таҳия гардидааст, ки ин санад мавриди мувофиқа қарор дорад.
Мулоқоти Хуршед Каримзода бо Масъуд Карбосиён  дар ҳошияи ҷаласаи ҳафтуми Шӯрои роҳбарони мақомоти гумруки кишварҳои аъзои Созмони ҳамкории иқтисодӣ (ЭКО –ECO)  ва ҷаласаи зеркумитаи коршиносони бахши гумруки кишварҳои ЭКО, ки 17-19 октябр дар Теҳрон доир гардид, ҷараён гирифт.