Аз ҳаёти «ситораҳо»-и варзиш ё шартномаи ҳангуфти Роналдо бо ширкати NIKE ба имзо расид

Душанбе, 17.11.2016 /АМИТ «Ховар»/. Футболбози шӯҳратёри португалии КФ «Реал»-и Мадрид Криштиано Роналдо шартномаи умрбодии худро бо ширкати NIKE-истеҳсолкунандаи либосҳои варзишии Амрико ба имзо расонд. Дар ин бора сомонаи «101greatgoals.com.» хабар медиҳад.
Аз рӯи ин шартнома ҳар сол ширкати NIKE ба Роналдо 24 миллион доллар тақдим мекунад. Бо ин маблағ ӯ то ба синни 73 расиданаш соҳиби як миллиард доллар мегардад.
Ин сеюмин шартнома дар таърихи варзиши ҷаҳон аст, ки бо бозингарон баста мешавад. Аз ин пештар чунин шартнома бо баскетболбозони амрикоӣ Майкл Ҷордан ва Леброн Ҷеймс ба имзо рсида буд. Дар бораи маблағи шартномаҳо бо ин бозингарон маълумоти муфассал нарасидааст.
Криштиано Роналдо бо ширкати NIKE аз соли 2003 ҳамкорӣ дорад ва бо дастаи «Реал»-и Мадрид 6-уми ноябр шартномаашро то соли 2021 дароз кард. Дар бораи маблағи шартномаи нав бо «Реал» чизе гуфта нашудааст.