Рашид Раҳимов: «Шояд КФ «Терек»-ро тарк гӯям»

Душанбе, 18.11.2016 /АМИТ «Ховар»/. Сармураббии клуби футболи «Терек»-и Грозний Рашид Раҳимов ба хабарнигори «Советский спорт» арз кардааст, ки бо сабаби бемор буданаш шояд дастаро тарк гӯяд. Ин мусоҳиба ҳангоми бозии дӯстонаи дастаи мунтахаби Русия ва Руминия дар варзишгоҳи «Аҳмад Арена»-и шаҳри Грозний доир шудааст.
«Дар айни замон ман намедонам, ки ба даста роҳбарӣ мекунам ё не, аммо ташхиси тиббии охир нишон дод, ки ман бояд шаш моҳи дигар муолиҷа гирам. Ҳамарӯза дору истеъмол мекунам. Эҳтимол меравад, ки ман аз сабаби бемор будан ин дастаро тарк гӯям», — овардааст «Советский спорт» аз қавли Рашид Раҳимов.
Рашид Раҳимов, мутахассиси 51-солаи футболи Тоҷикистон бо сабаби нохуб будани вазъи саломатиаш дар бозиҳои дастаи «Терек», ки ҳоло дар зинаи сеюми Премйер-Лигаи Русия ҷойгир аст, иштирок карда натавонист. Дастаро ёвари ӯ Игор Ледяхов ба майдон баровард.
Рашид Раҳимов аз соли 2013 инҷониб дастаи «Терек»-ро ба ҳайси сармураббӣ тамрин медиҳад. Қаблан ӯ дастаҳои «Амкар» ва «Локомотив»-и Маскавро низ машқ додааст. Рашид Раҳимов қаблан дар вазифаҳои муҳофизатгар ва нимҳимоятгар дар дастаҳои «Помир» (Душанбе), «Спартак» (Маскав), «Аустрия» (Вена) ва дигар дастаҳо бозӣ кардааст. Узви дастаи мунтахаби Русия ва Тоҷикистон, Устоди варзиши Иттиҳоди Шӯравӣ (1988) мебошад.
Рашид Раҳимов 18 марти соли 1965 дар шаҳри Душанбе ба дунё омадааст.