Тоҷикистон-минтақаи сайёҳӣ

Душанбе, 12.11.2016. /АМИТ «Ховар»/. Дар факултети муҳандисӣ-технологии Донишкадаи политехникии Донишгоҳи техникии Тоҷикистон дар шаҳри Хуҷанд таҳти унвони «Тоҷикистон- минтақаи сайёҳӣ» намоиш  доир гардид, ки ҳадафи он саҳм гузоштан дар ободии кишвар ва рушди саёҳату туризм буд.

Тавре аз Донишкадаи мазкур ба хабарнигори АМИТ «Ховар» хабар доданд,  дар намоишгоҳ донишҷӯёну устодони донишкада намунаи дастранҷи худро, ки барои густариши фарҳангу маданияти Тоҷикистон замина мегузорад, пешкаши ҳозирин гардониданд.

Ба иштирокдорон махсусан намоиши либосҳои миллӣ, лоиҳаҳои минтақаҳои истироҳатӣ, бизнес-нақшаҳо, расмҳои кашидашуда, туҳфаҳои омоданамудаи донишҷӯён аз сангу матоъҳо барои хориҷиён ва анвои гуногуни хӯрокиҳо писанд омаданд.