Тоҷикобод: тақдими туҳфаҳои пулӣ ба фарзандони собиқ кормандони шуъбаи корҳои дохилии ноҳия, ки зимни адои вазифа фавтидаанд

Тоҷикобод, 09.11.2016. /АМИТ «Ховар»/. Субҳи имрӯз дар бинои шуъбаи фарҳанги ноҳияи Тоҷикобод бо иштироки раиси нохия, командони шуъбаи Вазорати корҳои дохилӣ ва дигар мақомоти ҳифзи ҳуқуқ, собиқадорони милитсия ва ҷавонону роҳбарони ташкилоту муассисаҳои ноҳия иди касбии кормандони Вазорати корҳои дохилӣ — Рӯзи милитсия ботантана таҷлил гардид.
Дар ҷамъомад иброз гардид, ки кормандони милитсия барои барқарорсозии сохти конститутсионӣ, таъмини оромиву суботи сиёсӣ, тартиботи ҷамъиятӣ, ҳуқуқу озодиҳои инсон ва шаҳрванд аз лаҳзаҳои нахустини соҳибистиқлолии кишвар дар сафи пеши мубориза бар зидди гурӯҳҳои террористиву экстремистӣ, ҷинояткории муташаккили фаромиллӣ ва муомилоти ғайриқонунии маводи мухаддир шуҷоатмандиву далерӣ ва фидокориву ҷоннисорӣ нишон доданд. Онҳо дар таҳкими нуфузу эътибори давлати мо дар арсаи ҷаҳон саҳми арзанда гузоштаанд ва давлату ҳукумати кишвар барои таҳкими асосҳои моддиву техникии ин сохтори бонуфуз, ба хизмат ҷалб кардани кормандони баландихтисос, беҳтар намудани шароити зиндагӣ ва хизмати ҳайати шахсии Вазорати корҳои дохилӣ таваҷҷуҳи мунтазам зоҳир менамояд.
Дар хатми ҷамъомад як зумра кормандони пешқадаму собиқадорони ин ниҳод барои корнамоӣ ва садоқатмандона иҷро намудани вазифаи хизматӣ бо ифтихорнамаҳои Мақомоти иҷроияи ҳокимияти давлатии ноҳия сарфароз гардиданд.
Инчунин ба фарзандони собиқ кормандони шуъбаи корҳои дохилии ноҳия, ки зимни адои хизмат фавтидаанд, туҳфаҳои пулӣ тақдим гардиданд.