Дар шаҳри Хоруғ сабқати вилоятӣ оид ба шоҳмот оғоз шуд

ХОРУҒ, 08.12.2016 /АМИТ «Ховар»/. Бо ибтикори Ҷамъияти саҳомии шакли пӯшидаи «Шарқ Ко» беҳтарин шоҳмотбозон аз шаҳру навоҳии Вилояти Мухтори Кӯҳистони Бадахшон дар меҳмонхонаи «Сирена» барои гирифтани роҳхат ба мусобиқаи ҷумҳуриявӣ ба рақобат пардохтанд. Дар ин бора хабарнигори АМИТ «Ховар» хабар додааст.
Сардовари сабқат Вафомамад Нурмамадов ба соҳибкорони ватанӣ барои дар сатҳи баланд муҳайё кардани шароит барои шоҳмотбозон изҳори сипос намуда, гуфт: «Бори аввал мо дар ин мусобиқа аз соатҳои махсус барои ҳисоби дақиқи вақт ва тахтаҳои ҷавобгӯ ба меъёрҳои ҷаҳонӣ истифода мекунем. Лавозимоти варзиширо низ ҷамъияти мазкур дар ихтиёри варзишгарон гузошт. Федератсияи шоҳмоти вилоят ҳамчунин аз роҳбарияти ширкати барқии «Помирэнерҷӣ» барои тарғибу рушди ин намуди варзиш дар миёни наврасону ҷавонон ва оммавӣ гардонидани он миннатдор аст».
Панҷ сол пеш бо ташаббуси ширкати мазкур дар синфҳои ибтидоии мактабҳои таҳсилоти умумии шаҳри Хоруғ дарси шоҳмот роҳандозӣ шуд. Ҳоло қариб 100 нафар кӯдакон ба омӯзиши ин намуди ҷолиб ва шавқовари варзиш машғул мебошанд.
Ба гуфтаи Вафомамад Нурмамадов, «солҳои қаблӣ дар чунин сабқатҳо ҳамагӣ аз даҳ то 15 нафар ширкат мекарданд, аммо ҳоло теъдоди онҳо то ба 50 нафар расидааст».
Сабқат то 12 декабр давом мекунад. Ғолибон аз ҷониби ҶСШП «Шарқ Ко» бо мукофоти пулӣ сарфароз мегарданд.