Мулоқоти Шукурҷон Зуҳуров бо Сафири Фавқулода ва Мухтори Арабистони Саудӣ Абдулазиз-ал-Бодӣ

Декабрь 2, 2016 15:24

Душанбе, 02.12.2016 /АМИТ «Ховар»/. Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров бо Сафири тозаинтихоби фавқулода ва мухтори Арабистони Саудӣ дар Ҷумҳурии Тоҷикистон Абдулазиз-ал-Бодӣ бо хоҳиши ӯ мулоқот намуд.
«Мо аз сатҳ ва мундариҷаи муносибатҳои дуҷониба бо Шоҳигарии Арабистони Саудӣ қаноатманд ҳастем ва баҳри таҳкиму густариши бештари муносибатҳои ҳамкорӣ изҳори омодагӣ менамоем. Дар ин росто ёдовар шудан мехоҳам, ки Асосгузори сулҳу ваҳдати миллӣ Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон чор маротиба аз кишвари Шоҳигарии Арабистони Саудӣ боздид ба амал оварданд. Ин худ гувоҳи таваҷҷуҳи хосси роҳбарияти олии Тоҷикистон ба густариши муносибатҳои дӯстӣ ва ҳамкорӣ бо Арабистони Саудӣ мебошад», — зикр кард Ш.Зуҳуров ва илова кард, ки «Мо аз сиёсати хориҷии Ходими Ҳарамайни Шарифайн, ки ба пойдор намудани сулҳу субот ва фароҳам овардани шароит барои пешрафти иқтисодӣ ва ҳалли масъалаҳои иҷтимоӣ дар минтақа ва саросари олами Ислом нигаронида шудааст, пуштибонӣ менамоем».
Бояд гуфт, фаъолияти Комиссияи муштараки байни ҳукумати Ҷумҳурии Тоҷикистон ва Шоҳигарии Арабистони Саудӣ оид ба ҳамкории иқтисодӣ, тиҷоратӣ ва илмию техникӣ аз механизми муҳими ҳамкорӣ байни ду кишвар мебошад.
Ҳамчунин барои тавсеаи ҳамкории тиҷоратии байни ду кишвар таҳти сарпарастии сохторҳои иқтисодию тиҷоратӣ, сармоягузорӣ ва палатаҳои савдову саноат зарурати таъсиси Шӯрои доимоамалкунандаи соҳибкорони ду кишвар ва дар ин росто ба таври мунтазам доир намудани форумҳои иқтисодӣ, намоишгоҳҳои маҳсулоти кишоварзию саноатӣ ва дигар чорабиниҳои муштарак ба мақсад мувофиқ аст.
Раиси Маҷлиси намояндагон Шукурҷон Зуҳуров ҳамчунин афзуд, ки то ҷое огоҳӣ дорем, Арабистони Саудӣ мушкили оби ширину мусаффои ошомиданӣ дорад. Кишвари мо дорои захираҳои фаровони оби тоза аст, ки ҳама аз кӯҳҳо ва чашмаҳо ибтидо мегирад. Ба назари мо ду кишвар метавонанд дар соҳаи содироти оби ошомиданӣ аз Ҷумҳурии Тоҷикистон ба Шоҳигарии Арабистони Саудӣ ҳамкорӣ намоянд.
Парламенти Тоҷикистон ҳамчунин ҷиҳати густариши бештари муносибатҳои ҳамкорӣ бо Маҷлиси Шӯрои Шоҳигарии Арабистони Саудӣ омода аст, ки пояҳои қарордодиву ҳуқуқии муносибатҳои дуҷонибаро таҳким бахшад.
Сафири тозаинтихоби фавқулода ва мухтори Арабистони Саудӣ дар Ҷумҳурии Тоҷикистон Абдулазиз-ал-Бодӣ изҳор дошт, ки аз тамоми имконот ва донишу маҳорати худ ҷиҳати ба роҳ мондани ҳамкории сатҳи олӣ ва тақвияти муносиботи дуҷонибаи байни кишвараш ва Тоҷикистон дар тамоми заминаҳо талош хоҳад кард.

Декабрь 2, 2016 15:24

Хабарҳои дигари ин бахш

Имрӯз дар водиҳои Тоҷикистон ҳаво то 38 дараҷа гарм мешавад
Бо мақсади пешгирии ҳодисаҳои ғарқшавӣ таҳти унвони «Наҷоти сайёр» дар Душанбе ва ноҳияҳои тобеи ҷумҳурӣ корҳои фаҳмондадиҳӣ оғоз шуд
ҲАВАСМАНДИИ ОМӮЗГОРОН. Давоми 18 сол 3394 нафар омӯзгорони ҷавон дар вилояти Хатлон соҳиби замин гардиданд
Доир ба ташаббусҳои Пешвои миллат дар шаҳри Хоруғ конфронси ҷумҳуриявӣ баргузор шуд
137 акси аксбардори маъруфи тоҷик Заур Дахте ба фонди Осорхонаи миллии Тоҷикистон супорида шуд
Дар ноҳияи Дарвоз оид ба истифодаи сарфакоронаи неруи барқ вохӯрӣ доир гардид
ТАҶРИБАИ НАВ ДАР ЗАФАРОБОД. Дар хоҷагии деҳқонии «Ҳоҷӣ Адҳамхон» 56 адад панели офтобӣ насб карда шудааст
Сокинони ноҳияи Файзобод дар заминҳои наздиҳавлигӣ бештар картошка парвариш менамоянд
ИСТИФОДАИ САМАРАНОКИ ЗАМИН. Сокинони деҳаи Навдеҳи шаҳри Норак таҷрибаи пешқадами кишоварзони ҷаҳонро меомӯзанд
Имрӯз ҳаво дар шаҳри Душанбе то 37 дараҷа гарм мешавад
Дар 86 муассисаи таҳсилоти миёнаи касбии Тоҷикистон аз рӯйи 344 номгӯйи ихтисос мутахассисон омода карда мешаванд
Хиёбони Рӯдакӣ 57: манбаи имкониятҳои рақамӣ дар маркази Душанбе