Ба Деҳисор хати оби нӯшокӣ кашида мешавад

ДУШАНБЕ, 26.01.2017. /АМИТ «Ховар»/. Мақомоти иҷроияи ҳокимияти давлатии ноҳияи Бобоҷон Ғафуров тасмим гирифтааст аҳолии деҳаи Деҳисори ҷамоати деҳоти ба номи Ҳайдар Усмонови ноҳияро бо оби нӯшокӣ таъмин намояд. Деҳаи Деҳисор аз маркази ноҳия дар масофаи 120 км дуртар ҷойгир буда, дар он ҷо 800 нафар аҳолӣ зиндагӣ мекунанд. Сокинон солҳо боз аз сабаби ба талабот ҷавобгӯ набудани оби чоҳҳои амудии мавҷуда аз оби нӯшокӣ танқисӣ доранд.
Раиси ноҳияи Бобоҷон Ғафуров Зариф Назирӣ ва роҳбарони сохторҳои дахлдори ноҳия бо вазъи зиндагии аҳолӣ аз наздик шинос шуданд. Иттилоъ дода шуд, ки барои кашидани хати оби нӯшокӣ аз чашмаҳои кӯҳӣ ба ин деҳа аз ҷониби МИҲД-и ноҳия барои харидории қубурҳои обгузар дар масофаи 14 км 300 ҳазор сомонӣ ҷудо карда шуда, лоиҳаи он низ омода аст. Рӯзҳои наздик бо мусоид шудани вазъи иқлим корҳои кашидани хати оби нӯшокӣ тариқи ҳашар бо ҷалби сокинони деҳа оғоз меёбад.
Ҳамчунин Зариф Назирӣ бахшида ба Соли ҷавонон эълон гардидани соли 2017 бо ҷавонони деҳаи Деҳисор мулоқот намуда, онҳоро ҷиҳати саҳм гузоштан дар корҳои ободонӣ даъват намуд.