Дар байни хонандагони мактабҳои шаҳри Хоруғ озмуни «Китобхони беҳтарин» оғоз шуд

ХОРУҒ, 10.01.2017. /АМИТ Ховар/. Шуъбаи маорифи шаҳри Хоруғ дар миёни хонандагони мактабҳои таҳсилоти умумӣ озмуни «Китобхони беҳтарин» эълон кард. Мудири маорифи шаҳр Абдулвоҳид Абдулҳофизов дар суҳбат ба хабарнигори АМИТ «Ховар» гуфт, ки «дар замони муосир бо назардошти рушди бесобиқаи технологияи муосир шавқи кӯдакону наврасон ба китобхонӣ коста гаштааст. Агар мо ин камбудиро дар зудтарин фурсат ислоҳ накунем, баъди чанд сол дер мешавад. Аз ин рӯ мо ҳамеша ба омӯзгорон таъкид мекунем, ки шогирдонашонро маҷбур созанд ҳарчи бештар китоб мутолиа кунанд, то савияи дониши хаттӣ ва шифоҳияшон боло равад. Аз он ки аксарияти хонандагон баъди дарс бештари вақти худро дар марказҳои интернетӣ сипарӣ мекунанд, ин тақозои замон аст, аммо дур мондани онҳо аз китоб ин гуноҳи омӯзгорону волидон аст».
«Кӯдакон аз хурдсолӣ шеърҳои зиёдро аз худ мекунанд, аммо на ҳамаи онҳо маъною мафҳуми ин шеърҳоро дарк мекунанд. Аз ин рӯ, яке аз шартҳои озмуни мазкур шарҳу тавзеҳи асарҳои насрию назмӣ аз сӯи хонандагон аст»,-иброз дошт Ашратшо Карамшоев, як нафар аз ҳакамони ин озмун.
Ғолиби озмуни «Китобхони беҳтарин» дар охири мавсими таътили зимистона муайян шуда, бо туҳфаҳои шуъбаи маориф сарфароз мегардад.