Дар ДДТТ дар соли 2016 барои якчанд ихтисос ва зерихтисосҳои нав иҷозатнома гирифта шуд

ДУШАНБЕ, 12.01.2017. /АМИТ «Ховар»/. «Донишгоҳи давлатии тиҷорати Тоҷикистон дар айни замон аз рӯи 16 ихтисоси замонавӣ, ки 24 зерихтисоси ба талаботи бозори меҳнат заруриро дар бар мегирад, тибқи барномаҳои «Бакалавр», «Магистр», аспирантураю докторантура мутахассисон ва кормандони илмӣ-омӯзгориро тайёр мекунад». Ин нуктаро имрӯз зимни нишасти матбуотӣ ректори Донишгоҳи давлатии тиҷорат Мумин Шарифзода зикр намуд.
Мавсуф гуфт, ки имсол тибқи маълумоти комиссияи қабул шумораи умумии довлаталабони аз тарафи Маркази миллии тестии назди Президенти Ҷумҳурии Тоҷикистон ба донишгоҳ пешниҳодшуда 1232 нафарро ташкил намуд. Аз шумораи умумии довталабони пешниҳодшуда 1030 нафар- ба шуъбаи рӯзона 761 нафар, ғоибона 184 нафар ҳозир шуданд, ки ин 82,4 %-ро ташкил медиҳад.
Бояд гуфт, ки соли 2016 бо пешниҳоди раёсати донишгоҳ ва дастгирии Вазорати маориф ва илми Ҷумҳурии Тоҷикистон дар замимаи иҷозатнома оид ба пешбурди фаъолияти таълимӣ тағйиру иловаҳо ворид шуда, барои якчанд ихтисос ва зерихтисосҳои нав иҷозатнома гирифта шудааст.