Маҳмадшоҳ Гулзода: «Дар Донишгоҳи давлатии тиббии Тоҷикистон донишҷӯён аз 15 кишвари дунё таҳсил доранд»

ДУШАНБЕ, 11.01.2017. /АМИТ «Ховар»/. Имрӯз зимни нишасти матбуотӣ Маҳмадшоҳ Гулзода, ректори Донишгоҳи давлатии тиббии Тоҷикистон иброз намуд, ки дар донишгоҳ ҳамагӣ 810 нафар донишҷӯёни хориҷӣ таҳсили илм менамоянд ва онҳо аз 15 кишвари дунё мебошанд.
Ба иттилои ректор, бештари донишҷӯёни хориҷиро шаҳрвандони Ҳиндустон ва Ҷумҳурии исломии Афғонистон ташкил медиҳанд.
-Забони омӯзиш ба шаҳрвандони хориҷӣ забони русӣ ва англисӣ буда, забони тоҷикӣ ҳамчун забони хориҷӣ омӯзонида мешавад,- гуфт Маҳмадшоҳ Гулзода ва илова намуд, ки дар назар аст дар донишгоҳ солҳои оянда шумораи донишҷӯёни хориҷӣ зиёдтар гардонида шавад.