Майдони варзишӣ дар домани кӯҳ

ХОРУҒ, 11.01.2017 /АМИТ «Ховар»/. Касе агар ба шаҳри Хоруғ сафар карда бошад, дар куҷо ҷойгир будани маҳаллаи Хоруғро медонад. Ин маҳалла дар домани кӯҳ мавқеъ гирифтааст ва ёфтани китъаи ҳамвори замин дар ин ҷо ғайриимкон аст. Аммо ҷавонони ин маҳалла ташаббус зоҳир карда, қарор доданд, ки  дар қитъаи замини нокорам, дар бари кӯҳдоман майдончаи варзишӣ бунёд намоянд. Раиси маҳалла Миликшо Азизов гуфт, ки «мо дар маҳалла варзишгарони зиёд оид ба намудҳои мухталифи варзиш дорем, ки онҳо барои тамрин шароит надоранд. Як иддаи онҳо ба маҳаллаҳои дигари шаҳр рафта,  маҳорати худро такмил мдиҳанд, аммо баъзе аз онҳо чунин шароит надоранд. Бинобар ин мо қарор додем дар маҳаллаи худ майдончаи варзишӣ бунёд  кунем, агарчи он дар доманаи кӯҳ ҷой гирифтааст. Дарозии ин майдонча 60 метр буда, паҳноияш низ 60 метр аст. Сохтмони ин майдончаи варзишӣ сокинони маҳалларо аз хатари ҷорӣ шудани селу афтодани кӯҳпораҳо эмин нигаҳ медорад. Чун сангпорае аз кӯҳ канда шавад, ин майдонча аз ҳаракат онро боз медорад».
Сардори ҶДММ «Шер» Маҳмадбек Мамадбеков гуфт, ки ӯ аз ин иқдоми ҷавонони ташаббускор, ки барои ободии Ватан кӯшиш мекунанд, ҳамеша дастгирӣ мекунад, зеро дӯст доштани Ватан аз хонаю зодгоҳ  оғоз меёбад.