«Тоҷикагролизинг» мошинҳои пахтачинии муосирро ба ҷумҳурӣ ворид менамояд

ДУШАНБЕ, 26.01.2017 /АМИТ «Ховар»/. Дар соли 2017 Корхонаи воҳиди давлатии ҷумҳуриявии «Тоҷикагролизинг» бо мақсади таъмини пурраи талаботи хоҷагиҳои деҳқонӣ нақша дорад мошинҳои пахтачинии муосир, таҷҳизоти пиёзшинонӣ, пиёзканӣ, тамоми намудҳои тухмипошакҳои зироати ғалладонагӣ, решаканак ва мошинҳои сарчинро ба корхонаҳои истеҳсолкунанда фармоиш дода, ба Ҷумҳурии Тоҷикистон ворид намояд.
Тавре директори КВДҶ «Тоҷикагролизинг» Юсуф Акрамзода зимни нишасти матбуотӣ баён намуд, яке аз ҳадафҳои асосии сиёсати Ҳукумати Ҷумҳурии Тоҷикистон аз кишвари аграрӣ-саноатӣ ба кишвари саноатӣ-аграрӣ табдил додани ҷумҳурӣ мебошад ва дар робита ба ҳамин корхона вазифадор аст, ки дар заминаи механикунонии соҳаи кишоварзӣ роҳҳои ҳалли ин масъаларо ҷустуҷӯ намояд.
Роҳбарияти КВДҶ «Тоҷикагролизинг» вобаста ба фармоиши хоҷагиҳои деҳқонӣ дар наздиктарин фурсат техника ва таҷҳизоти дилхоҳро харидорӣ намуда, бо тариқи иҷораи молиявӣ (лизингӣ) дар ихтиёри онҳо қарор медиҳад.