«Об барои рушди устувор». Тоҷикистон барои беҳтар сохтани шароити зисти мардуми сайёра бори дигар саҳмгузор гардид

ДУШАНБЕ, 10.01.2016. /АМИТ «Ховар»/. Дар ташкилоти ибтидоии «Эндокринологҳо»-и Маркази клиникии ҷумҳуриявии эндокринологӣ бо иштироки директори Марказ Тоҳирҷон Тағоев, муовини раиси ташкилоти ибтидоӣ Амриддин Абдураҳмонов ва кормандони марказ дар мавзӯи «Тоҷикистон ҷаҳонро обшор мекунад» ҷамъомад баргузор гардид. Дар ин бора аз Маркази клиникии ҷумҳуриявии эндокринологӣ хабар доданд.
Тоҳирҷон Тағоев бо қабул шудани пешниҳоди Тоҷикистон дар бораи Даҳсолаи байналмилалии амал «Об барои рушди устувор» аз ҷониби СММ ва мамолики дунё оид ба аҳамияти стратегӣ ва экологӣ доштани он маърӯза кард. Боиси ифтихор аст, ки Тоҷикистони азиз дар беҳтарсозии шароити зисти мардуми сайёра бори дигар саҳмгузор гардид. Тавре Сарвари давлат дар Паём зикр намуд, «то садаи 21 дар минтақа 60 километри мукааб об истеъмол мешуд.Ҳоло он ба 110 километри мукааб расидааст. Имрӯз моро зарур аст, ки ба масрафи об аҳамияти ҷиддӣ дода, барои самаранок истифода шудани он тадбирандешӣ кунем».
Зикр шуд, ки дар дохили марказ низ бояд ба истифодаи самараноки об аҳамияти ҷиддӣ дода шавад, то ин амал барои дигарон намуна гардаду бо ин роҳ дар амалӣ шудани ин қатънома саҳмгузор бошем.
Амриддин Абдураҳмонов дар бораи қабул шудани қатъномаи Даҳсолаи байналмилалии амал «Об барои рушди устувор» барои солҳои 2018-2028 сухан гуфта, изҳори нигаронӣ аз гармшавии иқлим намуда, гуфт: «Ин раванд зиёда аз 1000 пиряхҳоро дар минтақа аз байн бурдааст. Ин ҳодисаи табиӣ метавонад оқибатҳои вазнинро барои мардуми сайёра ба бор оварад. Аз ҳамин сабаб мо бояд имрӯз пеши роҳи онро гирифта, бо самаранок истифода намудани об ба он таъсир расонем. Ин ташаббуси Тоҷикистон дар симои Сарвари давлат саривақтӣ ва зарурӣ буд. Аз ин рӯ, он аз ҷониби ҷомеаи ҷаҳонӣ тарафдорӣ гардида, дастгирӣ ёфт».