Ҳавои номусоид кишвар боз се рӯзи дигар боқӣ мемонад

ДУШАНБЕ, 17.02.2017. /АМИТ «Ховар»/. Боз се рӯзи дигар дар кишвар ҳавои номусоид боқӣ монда, дар водиҳо борони пуршиддат ва дар ноҳияҳои кӯҳӣ боридани барф дар назар дошта шудааст. Тавре мутахассисони Агентии обуҳавошиносии кишвар иттилоъ доданд, имрӯз дар шаҳри Душанбе ҳаво тағйирёбанда шуда, борон меборад. Шамол аз самти шарқ бо суръати аз 3 то 8 метр дар як сония мевазад. Ҳаво аз 12 то 14 дараҷа гарм мешавад.
Дар вилояти Бадахшон ҳавои тағйирёбанда шуда, борону барф меборад. Ҳаво дар ғарби вилоят то 5 дараҷа гарм ва дар шарқи он то 5 дараҷа сард хоҳад шуд. Дар вилояти Хатлон ҳавои тағйирёбандаи абрнок пешгӯйӣ мегардад. Борон борида, туман мефарояд. Дар водиҳо аз 12 то 17 дараҷа гармӣ пешбинӣ шудааст. Дар вилояти Суғд ҳавои тағйирёбанда пешбинӣ гардида, дар водиҳо борон меборад. Туман мефарояд. Дар водиҳо аз 6 то 11 дараҷа гарм хоҳад шуд. Ҳаво дар доманакӯҳҳо то 5 дараҷа гарм мешавад. Дар ноҳияҳои тобеи марказ ҳавои тағйирёбанда пешбинӣ мегардад. Боридани борон ба қайд гирифта шудааст. Ҳаво дар водиҳо аз 10 то 15 дараҷа гарм мешавад.
Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба диққати шаҳрвандон ва меҳмонони кишвар мерасонад, ки дар ин рӯзҳо эҳтимолияти болоравии сатҳи оби дарёҳо, лағзиши тарма ва сангрезиҳо, инчунин яхбандӣ ва ҷамъшавии ғарами барфҳо дар роҳҳои кӯҳӣ дар назар аст.
Бинобар ин аз шаҳрвандон хоҳиш мешавад, ки ба қадри имкон аз сафар ба ноҳияҳои кӯҳистон дар ин рӯзҳо худдорӣ намоянд.