Аз рӯзҳои аввали баҳор омӯзгорон ва донишҷӯдухтарон ба дарс бо либоси миллӣ мераванд

ДУШАНБЕ, 21.02.2017. /АМИТ «Ховар»/. Моҳе қабл Вазорати маориф ва илми Ҷумҳурии Тоҷикистон бо мақсади тарғиб ва эҳёи анъанаҳои неки ниёгон ва таҷлили шоистаи Наврӯзи байналмилалӣ ба ҳама муассисаҳои таълимӣ дархости расмӣ ирсол намуд.
Бино ба иттилои Амиршоҳ Ҷаъфаров, мутахассиси пешбари Вазорати маориф ва илми Ҷумҳурии Тоҷикистон, тибқи дархости расмӣ бояд омӯзгорону донишҷӯдухтарон ва ҳамчунин толибаҳои мактабҳои миёна аз 1 марти соли равон то анҷоми ҷашнҳои наврӯзӣ ба дарсҳо бо либоси миллии аз матои атласу адрас ва чакан бо сабку услуб ва нақшу нигори миллӣ дӯхташуда ҳозир шаванд.
Дар ин маврид ба мухбири АМИТ «Ховар» Назмия Қулматова, ҷонишини директор оид ба корҳои тарбиявӣ дар муассисаи таҳсилотии миёнаи умумии №72 ноҳияи Фирдавсии шаҳри Душанбе иброз дошт, ки «чунин як дастури расмӣ аз тарафи Вазорати маориф ва илми Ҷумҳурии Тоҷикистон ба муассисаи таълимии мо пешниҳод шуда буд, ки бо фаро расидани фасли баҳор тамоми омӯзгорзанон ва донишҷӯдухтарони муассисаҳои таълимӣ ба дарс бояд бо либоси миллӣ ҳозир шаванд».
Ба гуфти Н. Қулматова, «ин дастур омӯзгорон ва кулли хонандагони муассисаро рӯҳбаланд намуд. Мо ин иқдомро ҳамчун падидаи нек пайгирӣ намудем ва тасмим гирифтем, ки аз 1 марти соли равон пӯшидани либосҳои миллии атласу адрас ва чаканро дар муассиса байни духтарон ва омӯзгорзанон ҷорӣ намоем. Ба ин хотир муассисаи мо аз корхонаи «Нассоҷии тоҷик»-и шаҳри Душанбе чанд намуд матоъҳоро оварда, ба хонандагон пешниҳод намуд. Умед дорем, ки аз оғози баҳор толибаҳо бо ин либосҳо ба мактаб меоянд», — зикр намуд ҳамсуҳбати мо.
Корманди Кумитаи кор бо занон ва оилаи назди Ҳукумати Ҷумҳурии Тоҷикистон Маҳбуба Азимова оид ба пӯшидани либосҳои миллӣ аз ҷониби ҷавондухтарон иброз дошт, ки: «чунин иқдом гулдухтаронро ба он водор мекунад, ки аз фарҳанги бегона даст кашанд. Чеҳраи зани тоҷик дар тарзи либоспӯшӣ, рафтор, гуфтор ва маданияти волои ӯ намоён мегардад. Имрӯз мо ифтихор аз миллату фарҳанги куҳанбунёд ва тарзу усули хоси либоспӯшии тоҷикона дорем ва дар кишвари худ озод ҳастем. Биёед аз ин озодӣ истифода барем ва ҳеҷ вақт бегонапараст ва хурофотпараст набошем»,- зикр намуд М.Азимова.