«Боре дар уезд»-дар саҳнаи театри ба номи Лоҳутӣ

ДУШАНБЕ, 18.02.2017 /«АМИТ «Ховар»/. Ҳунарпешагони Театри давлатии драмавии русии ба номи Владимир Маяковский ду намоиши навро манзури тамошобинон мегардонанд. Тавре аз Вазорати фарҳанги Ҷумҳурии Тоҷикистон хабар доданд, намоиши аввал бо номи «Шабе дар театр» дирӯз, 17 феврал соати 17:30 дар толори хурди Театри давлатии академии драмавии ба номи Абулқосим Лоҳутӣ ба тамошо гузошта шуд.
«Намоиши «Шабе дар театр» аз рӯи пйесаи нависандаи машҳури рус Антон Павлович Чехов бо коргардонии ҳунарпешаи шинохта Хуршед Мустафоев рӯи саҳна омадааст. «Шабе дар театр» намоиши мазҳакавӣ аст ва се ҳикоя: «Хирс», «Таклиф» ва «Суруди парвози баланд» -ро дарбар мегирад»,-хабар дод манбаъ.
Намоиши дуюм «Боре дар уезд» номгузорӣ шуда, он ҳам мазҳака мебошад. Ин намоиш низ аз рӯи осори Антон Павлович Чехов бо коргардонии Ҳунарпешаи халқии Тоҷикистон Баҳодур Миралибеков таҳия гардидааст. Он аз ду ҳикояи муаллиф- «Ҷарроҳӣ» ва «Бадсигол» иборат аст.
Баргузории нахустнамоиши «Боре дар уезд» имрӯз, 18 феврал соати 15:00 дар толори хурди Театри давлатии академии драмавии ба номи Абулқосим Лоҳутӣ дар назар аст.