Дар ММТ соли 2016 барои таъмини шаффофият ва бехатарии раванди имтиҳонҳо назорати видеоӣ ба роҳ монда шуд

ДУШАНБЕ, 06.02.2017. /АМИТ Ховар/. Маркази миллии тестии назди Президенти Ҷумҳурии Тоҷикистон соли 2016 барои таъмини шаффофият ва бехатарии раванди имтиҳонҳо дар ҳамкорӣ бо мақомоти иҷроияи маҳаллии ҳокимияти давлатии шаҳру ноҳияҳо ва муассисаҳои таълимии дахлдори марказҳои имтиҳониро бо воситаҳои назорати видеоӣ ҷиҳозонида, раванди имтиҳонсупории довталабонро аз ҳар як синфхонаи имтиҳонӣ сабт намуд. Инчунин барои мушоҳида кардани раванди имтиҳон аз ҷониби волидайн ва дигар шахсони довталабонро ҳамроҳикунанда аз ҳар синфхонаи имтиҳонӣ дар ҳар маркази имтиҳонӣ толори махсус ташкил шуда, раванди имтиҳонсупории довталабон ба таври мустақим тавассути экранҳо намоиш дода шуд.
Тавре аз Маркази матбуоти Маркази миллии тестии назди Президенти Ҷумҳурии Тоҷикистон иттилоъ доданд, аз шумораи умумии довталабони азқайдгузашта соли 2016 дар имтиҳонҳо 78327 нафарашон иштирок карданд, ки шумораи умумии довталабон 92,55 %- ро ташкил медиҳад. Нишондиҳандаи иштироки довталабон дар соли 2016 нисбат ба соли 2015 0,91% ва нисбат ба соли 2014 3,21% зиёд аст.
«Дар соли 2016 Марказ бо мақсади шаффофу дастрас баргузор намудани имтиҳонҳо дар 15 шаҳру ноҳияи ҷумҳурӣ 43 маркази имтиҳонӣ, аз ҷумла дар шаҳри Душанбе 15, ноҳияи Рашт 1, вилояти Суғд 11, вилояти Хатлон 14 ва дар Вилояти Мухтори Кӯҳистони Бадахшон 2 маркази имтиҳонӣ ташкил кард. Шумораи марказҳои имтиҳонӣ соли 2016 нисбат ба соли 2015 2-то ва нисбат ба соли 2014 4-то бештар аст.»,- изҳор дошт манбаъ.