Ду нафар барои тасарруфи маблағ аз ҳисоби нафақаи ғайриқонунӣ дастгир шуданд

ДУШАНБЕ, 06.02.2017. /АМИТ «Ховар»/. Кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон сармутахассиси шуъбаи Агентии суғуртаи иҷтимоӣ ва нафақа ва сармутахассиси Хадамоти давлатии ташхиси тиббию иҷтимоии ноҳияи Шуғнони ВМКБ-ро барои тасарруфи маблағ аз ҳисоби нафақаи ғайриқонунӣ айбдор донистанд.
Тавре ба АМИТ «Ховар» аз маркази матбуоти агентии мазкур хабар доданд, Ғарибмо Абдураҳмонова аз соли 2012 то инҷониб дар вазифаи мазкур кор карда, моҳи августи соли 2013 аз муоинаи Хадамоти давлатии ташхиси тиббию иҷтимоӣ гузашта, ба ӯ нафақаи маъюбии гурӯҳи 3-юм ба муҳлати 1 сол ба маблағи 407 сомонӣ дар як моҳ таъйин карда шуд. Баъди ба охир расидани муҳлати нафақаи маъюбиаш ӯ дигар аз муоинаи тиббӣ нагузашта, бо маслиҳати пешакӣ бо сармутахассиси Хадамоти давлатии ташхиси тиббию иҷтимоии ноҳияи Шуғнон Саъдӣ Ақдодов ба рӯйхати нафақагирони маъюбӣ дидаю дониста, маълумоти бардурӯғ оид ба маъюбӣ дароварда, аз моҳи майи соли 2014 то моҳи июни соли 2016 ҷамъ ба маблағи 21356,20 сомонӣ нафақаи маъюбии гурӯҳи 3-юмро гирифтааст.
Нисбат ба Ғ. Абдураҳмонова ва С. Ақдодов бо моддаҳои 245, қисми 2, банди «г», ва моддаи 323 КҶ Ҷумҳурии Тоҷикистон парвандаи ҷиноятӣ оғоз карда шуда, баъди ба итмом расидани тафтиши пешакии парвандаи ҷиноятӣ бо тасдиқи фикри айбдоркунӣ барои моҳиятан баррасӣ намудан он ба суд ирсол карда шуд.