Хуррамгардонии шаҳри Душанбе-рисолати сокинони пойтахт!

ДУШАНБЕ, 20.02.2017. /АМИТ «Ховар»/. Аз ҷониби Раёсати ҷавонон, варзиш ва сайёҳии шаҳри Душанбе дар ҳамкорӣ бо Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон шанбеи гузашта дар шаҳраки 46-и пойтахт бо иштироки бошандагони хобгоҳҳои донишҷӯён ҳашари тозагии ҷавонон гузаронида шуд. Дар ин бора ба АМИТ «Ховар» мудири бахши кор бо ҷавонони Раёсати ҷавонон, варзиш ва сайёҳии шахри Душанбе Маҳкамбой Гулов иттилоъ дод.
Ҳашар дар доираи Соли ҷавонон ба хотири ҷонибдорӣ аз ташаббусу иқдомҳои мақомоти иҷроияи ҳокимияти давлатии шаҳри Душанбе ҷиҳати эълон намудани 150 рӯзи ободониву созандагӣ, ниҳолшинонию сабзазоркунӣ таҳти унвони «Хуррамгардонии Душанбешаҳр-рисолати сокинони пойтахт!» ва иқдоми ҷумҳуриявии 75 рӯзи ниҳолшинонии ҷавонон таҳти унвони «Дарахти дӯстӣ биншон, ки коми дил ба бор орад!» гузаронида шуд. Дар ҷараёни он ҷавонон ба тоза намудани роҳраву даруни ҷӯйборҳо, биноҳо, боғу гулгаштҳои ҳудуди шаҳрак, нарм намудани бехи дарахтон машғул гардиданд.
Аз ҷониби иштирокчиён зикр гардид, ки чун пайравони асили Пешвои миллат минбаъд низ ҷиҳати бунёдкориву созандагӣ ва сабзкориву хуррамгардонии пойтахти азизамон- шаҳри Душанбе ҳисса мегузоранд.