Муқаррароти Қонуни ҶТ «Дар бораи танзими анъана ва ҷашну маросимҳо дар Ҷумҳурии Тоҷикистон» аз тарафи баъзе шаҳрвандон риоя намешавад

ДУШАНБЕ, 07.02.2017. /АМИТ «Ховар»/. Дар Агентии назорати маводи нашъаовари назди Президенти Ҷумҳурии Тоҷикистон вохӯрии ҳайати шахсӣ бо намояндагони Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон баргузор гардид.
Тавре ба АМИТ «Ховар» аз маркази матбуоти агентии мазкур хабар доданд, намояндагони кумита доир ба муқаррароти бандҳои Қонуни ҶТ «Дар бораи танзими анъана ва ҷашну маросимҳо дар Ҷумҳурии Тоҷикистон» сухан гуфтанд. Таъкид гардид, ки мушоҳидаҳо нишон медиҳанд, ки баъзе аз шаҳрвандон муқаррароти қонуни мазкурро риоя накарда, дар баргузории маъракаҳои хурсандӣ ба зиёдаравиҳо роҳ медиҳанд. Вобаста ба ин наворҳои тӯю маъракаҳо, ки аз ҷониби кормандони кумита сабт гардидаанд, ба ҳайати шахсии агентӣ бо истифода аз мониторҳо намоиш дода шуданд.
Зикр гардид, ки нисбат ба риояи ҳатмии муқаррароти қонуни мазкур ва пешгирии қонуншиканиҳо дар ин самт бояд ҳамагон масъул бошанд, зеро талаботи ин қонун манфиати иқтисодии шаҳрвандони кишварро ҳифз менамояд.
Бояд гуфт, ки тибқи иттилои Кумитаи оид ба корҳои дин, танзими анъана ва ҷашну маросимҳои миллии назди Ҳукумати ҶТ соли гузашта вобаста ба Қонуни ҶТ «Дар бораи танзими анъана ва ҷашну маросимҳо дар Ҷумҳурии Тоҷикистон» дар судҳо 784 парвандаҳои ҳуқуқвайронкунии маъмурӣ баррасӣ шуданд. Аз онҳо нисбат ба 767 нафар дар маҷмӯъ ба маблағи зиёда аз 2 млн. 427 сомонӣ ҷарима татбиқ карда шудааст.