Сафири Тоҷикистон ба Шоҳи Нидерланд эътимоднома супорид

Февраль 17, 2017 09:19

ДУШАНБЕ, 17.02.2017 /АМИТ «Ховар»/. Дар шаҳри Гаага 15 феврал маросими супоридани эътимоднома аз ҷониби Сафири Фавқулода ва Мухтори Ҷумҳурии Тоҷикистон дар Подшоҳии Нидерланд Эркинхон Раҳматуллозода ба Аълоҳазрат Шоҳи Нидерланд Виллем-Александр баргузор гардид.
Тавре аз Вазорати корҳои хориҷии Ҷумҳурии Тоҷикистон хабар доданд, пас аз ба анҷом расидани маросими супоридани эътимоднома байни Сафири навтаъйини Тоҷикистон ва Шоҳи Нидерланд мулоқоти дуҷониба сурат гирифт. Эркинхон Раҳматуллозода салому паёмҳои гарми Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба Аълоҳазрат Подшоҳи Нидерланд тақдим дошт ва омодагии Тоҷикистонро ҷиҳати таҳким ва густариши равобити созандаи ду кишвар, бо самту равандҳои ҷадид ғанитар сохтани онҳо ва густариш додани равобити Тоҷикистону Нидерланд дар чаҳорчӯби созмонҳои байналмилалию минтақавӣ, махсусан дар самти ҳамкорӣ дар соҳаи об иброз дошт.
Подшоҳи Нидерланд, ки ҳангоми валиаҳд буданаш тайи чанд сол роҳбари яке аз сохторҳои СММ оид ба об буд, ин пешниҳодро дастгирӣ намуд. Ҳамзамон ӯ бо изҳори таваҷҷуҳи хосса ба вазъи минтақа ва Афғонистони ҳамҷавор, мубориза бар зидди таҳдиду хатарҳои муосир, имкониятҳои рушди минбаъдаи равобити иқтисодӣ таъкид дошт, ки Нидерланд ҷонибдори таҳкиму тавсеаи равобити созанда бо Тоҷикистон аст.
Дар фарҷоми мулоқот Шоҳи Нидерланд Виллем-Александр аз Сафир хоҳиш кард, ки салому орзуҳои некашро ба мардум ва Сарвари Тоҷикистон Ҷаноби олӣ Эмомалӣ Раҳмон бирасонад.
Дар чаҳорчӯби сафар ба шаҳри Гаага, Эркинхон Раҳматуллозода бо намояндагони расмии кишвари иқомат ва роҳбарони ташкилотҳои байналмилалӣ мулоқотҳои судманд барпо намуд. Аз ҷумла, мулоқотҳои дуҷониба бо Президенти Суди байналмилалии ҷиноӣ Силвия Фернандес де Гурменди, муовини Директори Европол Олдрич Мартину, муовини Дабири кулли Вазорати корҳои хориҷии Подшоҳии Нидерланд Роналд ван Ройден ва сардорони як теъдод раёсатҳои марбутаи ин Вазорат барпо гардиданд, ки дар онҳо мавзӯоти мавриди таваҷҷуҳи тарафайн, аз ҷумла масоили ҳамкорӣ ва шарикии кишварҳои аъзои Иттиҳоди Аврупо дар татбиқи «Стратегияи миллии рушди Тоҷикистон то соли 2030» мавриди баррасӣ қарор гирифтанд.

Февраль 17, 2017 09:19

Хабарҳои дигари ин бахш

Бо ташаббуси Тоҷикистон дар ЮНЕСКО ҳамоиши сатҳи баланд оид ба яхшиносӣ баргузор гардид
Ҷаласаи Кумитаи машваратии роҳбарони хадамотҳои ҳуқуқии вазоратҳои корҳои хориҷии давлатҳои аъзои ИДМ баргузор шуд
Сафири Тоҷикистон бо Мудири иҷроияи Аввалин бонки Абу Забӣ мулоқот намуд
Ҳамкории Тоҷикистон бо Комиссияи иқтисодии Созмони Милали Муттаҳид баррасӣ гардид
Дар Париж ҳамкории Тоҷикистон бо ЮНЕСКО баррасӣ шуд
Шаҳрвандони Эрон аз бақайдгирии ҳатмӣ дар Тоҷикистон озод шуданд
Сироҷиддин Муҳриддин дар чорабиниҳои ҷашнӣ дар қароргоҳи ЮНЕСКО иштирок намуд
Вазири меҳнат, муҳоҷират ва шуғли аҳолии Тоҷикистон дар Конфронси байналмилалии меҳнат иштирок намуд
Сафири Тоҷикистон бо ҳамраиси гурӯҳи дӯстии байнипарлумонии Тоҷикистон ва Корея мулоқот намуд
Сарвазири мамлакат Қоҳир Расулзода дар Форуми байналмилалии сармоягузории Тошканд иштирок намуд
Пешниҳоди Тоҷикистон ва Фаронса оид ба эълони солҳои 2025-2034 ҳамчун «Даҳсолаи амал барои илмҳои криосферӣ» аз ҷониби ҷомеаи ҷаҳонӣ дастгирӣ ёфт
Сироҷиддин Муҳриддин дар нишасти 4-уми вазирони корҳои хориҷии Муколамаи «Осиёи Марказӣ-Ҳиндустон» иштирок намуд