Сокини ноҳияи Бобоҷон Ғафуров мехост бо роҳи қаллобӣ маблағ ба даст оварад

ДУШАНБЕ, 21.02.2017 /АМИТ «Ховар»/. Ҳангоми гузаронидани чорабиниҳои фаврӣ-ҷустуҷӯӣ аз ҷониби кормандони милитсия марди 40-солаи сокини ноҳияи Бобоҷон Ғафуров, ки пеш бо моддаи 247 қисми 3 Кодекси ҷиноятии Ҷумҳурии Тоҷикистон суд шудааст, бо гумони содир намудани ҷинояти қаллобӣ дастгир шуд.
Тавре аз Вазорати корҳои дохилии Ҷумҳурии Тоҷикистон хабар доданд, гумонбаршуда соли 2016 бо роҳи фиреб ба боварии марди 41-солаи сокини шаҳри Хуҷанд даромада, аз ӯ 129 ҳазор сомонӣ гирифта, ба манфиати шахсиаш сарф намудааст.
Ҳамчунин оид ба қаллобӣ марди 43-солаи сокини ноҳияи Шаҳритус муроҷиат намудааст, ки моҳи ноябри соли 2014 марди 49-солаи сокини ноҳияи Қубодиён аз бовариаш истифода намуда, аз ӯ 14 ҳазор доллари амрикоӣ гирифта, то ҳол барнагардонидааст.
Вобаста ба далелҳои мазкур парвандаҳои ҷиноятӣ оғоз гардида, корҳои тафтишотӣ идома доранд.