Табиби яке аз таваллудхонаҳои шаҳри Душанбе ба порагирӣ гумонбар дониста мешавад

ДУШАНБЕ, 18.02.2017. /«АМИТ «Ховар»/. Дар вақти гузаронидани чорабиниҳои фаврӣ-ҷустуҷӯӣ марди 37-солаи сокини шаҳри Душанбе, духтури яке аз таваллудхонаҳои пойтахт бо гумони гирифтани пора дастгир гардид.
Тавре аз Хадамоти матбуоти Вазорати корҳои дохилии Ҷумҳурии Тоҷикистон хабар доданд, гумонбаршуда 16 феврали соли равон аз бемор, зани 23-солаи сокини шаҳри Душанбе барои ҷарроҳӣ 5 ҳазору 600 сомонӣ маблағро ҳамчун пора талаб кардааст. «Дар вақти гирифтани маблағи мазкур дар назди бинои баландошёнаи «Душанбе-Плаза», гумонбаршуда аз ҷониби кормандони милитсия дастгир карда шуд» ,-хабар доданд аз Вазорати корҳои дохилӣ.
Аз рӯи далели мазкур парвандаи ҷиноятӣ оғоз гардида, тафтишот давом дорад.