Тоҷикистону Афғонистон ҷинояткоронро истирдод менамоянд

ДУШАНБЕ, 20.02.2017. /АМИТ «Ховар»/. Ду кишвари ҳамҷавор Тоҷикистон ва Афғонистон ҳамкориро дар мубориза бар зидди кофтукови ҷинояткорон ва истирдоди онҳо ба кишварҳои ҳамдигар густариш медиҳанд. Дар ин росто вакилони палатаи поёнии Парлумони Тоҷикистон Созишнома байни Ҷумҳурии Тоҷикистон ва Ҷумҳурии Исломии Афғонистон оид ба истирдодро ба тасвиб расониданд.
Аламшо Абдураҳмонзода, муовини аввали Вазири корҳои дохилии Ҷумҳурии Тоҷикистон мегӯяд, ки самти асосии Созишномаи мазкур ба рушди фаъолонаи ҳамкории мутақобилан судманди Тоҷикистону Афғонистон дар самти кофтукови ҷинояткорон, истирдоди онҳо, ба ҷавобгарии ҷиноятӣ кашидани шаҳрвандони Тоҷикистон, ки дар қаламрави кишварамон ҷиноят содир намуда, дар давлатҳои хориҷӣ паноҳ мебаранд, нигаронида шудааст. Ҳамзамон санади мазкур тартиби истирдод, нигоҳ доштани шаҳрвандон дар боздоштгоҳҳои муваққатӣ, шароити истирдод, мусодираи амволеро, ки бо роҳи ғайриқонунӣ ба даст омадаанд, муайян менамояд.
Мавриди зикр аст, ки шаҳрвандони Афғонистон, ки дар муассисаҳои ислоҳии Тоҷикистон нигоҳ дошта мешаванд, асосан бо ҷурми қочоқи маводи мухаддир ва убури ғайриқонунии сарҳади давлатии Ҷумҳурии Тоҷикистон дастгир шудаанд. Шаҳрвандони Тоҷикистон, ки дар маҳбасҳои Афғонистон нигоҳ дошта мешаванд, нафаронеанд, ки бо ҷурми даст доштан дар ҷиноятҳои дорои хусусияти экстремистию террористӣ маҳкум гардидаанд.