Александр Бородюк сармураббии дастаи мунтахаби Қазоқистон оид ба футбол интихоб шуд

ДУШАНБЕ, 01.03.2017 /АМИТ «Ховар»/. Александр Бородюк, собиқ мураббии дастаи мунтахаби Россия оид ба футбол сармураббии дастаи мунтахаби Қазоқистон интихоб шуд. Дар ин бора маркази матбуоти Федератсияи футболи Қазоқистон (ФФҚ) хабар додааст.
Шартномаи ин мутахассис ба муҳлати се сол баста шуд. Собиқ сармураббии дастаи мунтахаби Қазоқистон Талгат Байсуфинов ба вазифаи директори техникии ФФҚ гузаронида шуд.
Охирин клубе, ки Александр Бородюк фаъолият кардааст, дастаи «Кайрат»-и Алмаато дар аввали соли 2016 гуфта мешавад. Баъди се вохӯрии даста Бородюк «Кайрат»-ро тарк кард.
Аз соли 2002 то 2012 Бородюк ба ҳайати мураббиёни дастаи мунтахаби Россия шомил буд ва ба мураббиён Валерий Газзаев, Юрий Сёмин, Гус Ҳиддинг ва Дик Адвокат кумак кардааст. Соли 2005 вазифаи сармураббигии дастаи мунтахаби Россияро бо Бразилия (0:1) дар бозии дӯстона Бородюк ба уҳда дошт.
ФФҚ дар назди Бородюк вазифа гузоштааст, ки ҳайати дастаи мунтахабро ҷавон карда, бозингарони беҳтарин ва бомаҳорати ин кишварро зери парчами дастаи мунтахаб гирд орад.